Khawvel Sunday School Ni

Nimin Pathianni kha Khawvel Sunday School Ni a ni a, Mizoram hmun hrang hrangah hman a ni. Presbyterian Kohhran chuan puitling lamah Pu Mûka chanchin an zir a, naupang lamin CT Studd-a chanchin an zir thung.

Khawvel Sunday School Ni hi United States-a Tabernacle Presbyterian Kohhrana mi, Dr George W Bailey-a rawt chhuah nia sawi a ni a, kum 1907-a World's Sunday School Association Convention, Rome-a neihah leh kum 1910-a Washington Convention-a an sawihona May 22, 1910 aṭangin hman ṭan niin an sawi.

Mizoramah chuan Khawvel Sunday School Ni hi kum 1944-ah hman ṭan a ni a, kum 1949 aṭangin thupui neiin November thla Pathianni hmasa berah hman ṭhin a ni.