Mizoramah 42%-in biometric enrolment ti tawh

Nimin khan Lunglei DC conference hall-ah 'Aadhaar sensitization meeting cum workshop' buatsaih a ni a, Lunglei DC Lalzarmawii'n a hmanpui. Meeting-ah hian Mizoramah mihring awm zat aṭanga 42%-in biometric enrolment an tih tawh thu tarlan a ni.

Lalzarmawii chuan, tunlaiah sorkar aṭanga hamṭhatna dawng turin India khua leh tuite tan Aadhaar card neih a ṭul tawh thu a sawi a, "Mipuiin a ṭangkaina kan hre zel a, corruption pawh nasa takin a do thei dawn a ni," a ti.

Lunglei DC sawi danin, Mizoram bikah National Population Register (NPR) hi biometric enrolment hmangin October 5, 2013 aṭangin kalpui ṭan a ni a, October 31, 2016 hmaa zo hman vek tura ruahman a nih laiin, sorkarin mipuite hmakhua ngaiin March 31, 2017 thleng hun a pawtsei.

Meeting-a tarlan danin, tun dinhmunah Mizoramah 42%-te'n biometric enrolment an ti tawh a, Lungleiah chuan April 4, 2016 thleng khan mi 70,233 (55.17%)-in an ti tawh. Lunglei district-ah Enrolment Centre pariat awm tura ruahman a ni a, mi 57,081-in enrolment tih an la hmabak a, khawpui chhungah chuan V/C tahtawlin enrolment kalpui tum a ni.