Thawktu tur lak theih loh vangin Polytechnic a la kal tluang thei lo

Champhai district MJA member-te chuan tun hnai khan Tlangsama Mizoram Polytechnic building an tlawh a; anmahni lo dawngsawngtu official-te chuan, thawktu tur lak theih a la nih loh avangin Polytechnic chu a nihna anga kalpui theih a la nih loh thu an lo hrilh.

Champhai MJA-te hian Mizoram Polytechnic building chu sak zawh vek tawh ni si, hun rei tak a nihna tur anga kalpui a nih loh avangin an tlawh a ni.

Official-te chuan, building hawn loh chhan leh a nihna ang tura kalpui a nih theih lohna chhan ber chu - thawktute hlawh pek leh a enkawl chhohna tur chu state sorkar chanvo a ni a, thawktu lakna tur (post creation) chu state sorkara a la kaltlang thei loh vang a ni.

Polytechnic bul ṭan nan Ministry of Human Resources Development chuan Rs. 12,30,00,000 a ruahman a, Rs. 8,00,00,000 chu building sakna tur niin, Rs. 4,30,00,000 chu machineries & equipment, laboratory material, learning resource material, transportation leh a dangte atan ruahman a ni.