NLUP-ah tualchhung vawk tê sem tan

PRRS a lên vanga NLUP hnuaiah thla ruk chhung vawk notê sem chawlhsan a nih hnuah nimin khan Mizoram hmun hrang hrangah tualchhung vawk tê sem ṭan leh a ni.

Vawk note sem ṭan puala inkhawm, Aizawla Veterinary Polyclinic buatsaih chu AH&Vety minister C Ngunlianchunga'n a hmanpui.

C Ngunlianchunga chuan, intodelh loh vangin NLUP hnuaiah state páwn aṭanga vawk lak luh
ṭhin a nih thu sawiin, "Sum tam tak state páwnah a luangral ṭhin. Tunah chuan tualchhungah ngei vawk notê sem tur a awm tâk avangin sum tak tak state páwna lung ral tur hum a ni ta a, a lawmawm hle," a ti a; hri a lêng leh a nih loh chuan NLUP hmangin vawkah intodelh theih beisei a nih thu a sawi.

NLUP hnuaia vawk note sem chu ruahmanna fel tak siama kalpui a nih thu sawiin AH&Vety Minister chuan, "Thawktute an taimak leh rinawm a ṭul dawn. Meeting-a thu ṭha tak tak rêl ringawt a tâwk lo a, a taka thawh a, feh chhuah a ngai," a ti.

Inkhawm kaihruaitu AH&Vety director Dr. Saingura Sailo chuan Mizoram ah vawksa kan mamawh reng avangin beneficiary-te'n an vawk tiriral mai loin an vulh pung ngei ngei tur a nih thu sawiin, "Vawkte pek hmasakte hi ngun taka vil an ni dawn a thla thum hnuah review meeting neih leh tur a ni," a ti a, vawk tiriral an awm a nih chuan a dang pek zui an nih dawn loh thu a sawi.

NLUP third phase leh fourth phase hnuaiah vawk vulh thlang mi 813 an awm a, vawk note 48,978 sem tum a ni. Benificiary pakhat zel tan vawk note paruk, a pui tur pahnih leh talh tur pali zel sem tura ruahman a ni a; pathum pek phawt an ni ang a, a tiṭha lote chu pek chhunzawm an ni dawn lo.

NLUP hnuaia vawk notê sem hi nimin khan Aizawl bakah, district khawpui zawng zawng leh khaw dang ṭhenkhatah tih ṭan a ni a; a semna hmuna sorkar hotute'n a dawngtu turte hnenah an hlan a ni.