Zûk leh hmuam ti an tlakhniam nan Tan la turin Mizoram mipui sáwm

Mizoram State Tobacco Control Society (MSTCS) leh Indian Society on Tobacco and Health (ISTH) Mizoram Chapter-te chuan, November thla laihâwl aṭangin Mizoram pumah Global Adult Tobacco Survey (GATS) tih a nih dawn thu an puang a; zûk leh hmuamah Mizoram dinhmun a tlakhniam theih nana ṭan la ṭheuh turin Mizoram mipui an sáwm.

MSTCS leh ISTH Mizoram hruaitute hian nimin khan Aizawl Press Club-ah thuthar thehdarhtute an kâwm a; ISTH Mizoram president Lal Riliani chuan, Mizo mipuite'n zûk leh hmuam an tih lohna tura hma an laknaah hmai dur deuhte an tawn ve thin thu sawiin, "Mahse, Pathian ṭanpuinain ṭha takin kan kal thei a ni," a ti.

Lal Riliani chuan, GATS-in Mizoram dinhmun an zir chianna turah Mizoramin hma a sawn theih nana ṭan lakpui turin media-te leh Mizo mipui a sáwm.

Ram dang neih ve loh tuibûr Mizoramin a nei bik chu pawi a tih thu sawiin, "Tuibur factory-te hi a hnawksak hle, a bul hnaia mite'n thuneitute hnenah pawh an thlen ṭhin," a ti a; AMC leh DC-te'n tuibûr factory-te chu titawp turin lehkha an pe tawh ṭhin mah se, a la tawp thei rih lo tih a sawi.

Zawhna chhangin ISTH President chuan, zûk leh hmuam ṭhat lohzia inzirtir kawngah doctor-te zingah ṭhahnemngai tak tak awm mah se, doctor-te an la duhkhawp loh thu a sawi a, "Tun ai hian mithiam doctor-te hian veiin ṭan la leh zual se kan duh khawp mai. An damlote hnenah vaihlo ṭhat lohzia lo hrilh zel thei se kan duh a ni," a ti.

MSTCS-a state nodal officer Dr Jane R Ralte-in GATS hnuhnung ber 2009-2010-a Mizoram dinhmun a tarlang. GATS hnuhnung bera a lan danin, India ram mihring zawng zawng zinga 34.6%-in zûk leh hmuam an ti a, Mizoram mihring zawng zawng zinga 67.2%-in an ti a, mihring zat aṭanga tehin Mizoram hi zûk leh hmuam ti tamna ber a ni. Mizorama zûk leh hmuam ti hi mipaah 72.5% leh hmeichhiaah 61.6% a ni.

Mizoramah meizial zu 39.7% an awm a, mipaah 59.4% leh hmeichhiaah 19% a ni a; mei zu lo, hmuam leh ei chi ti 41% an awm a, mipaa 32.6% leh hmeichhiaah 49.1% a ni. Mahni ina zuk leh hmuam ti 96.5%, hnathawhna hmuna ti 62%, restaurant-a ti 16.8%, public transportation-a ti 8.3% leh vantlang hmun danga ti ṭhin 27.3% an awm.

Hetih lai hian, MSTCS leh ISTH Mizoram hotute chuan, zûk leh hmuam ti tam lam dinhmun tehna (GATS) thar chhuak turah Mizoram dinhmun chu a tlakhniam ngei an beisei thu an sawi.

GATS hi ram 25-ah kalpui a ni a, International Institute of Population Science (IIPS), Mumbai chu nodal agency niin, agency dangin an pui ṭhin. GATS hnuhnung berah khawpui leh thingtlanga mi chi hrang hrang, kum 15 chung lamte zûk leh hmuam chungchang zawh ṭhin an ni.