MPF-in BJP-te sorkar ṭha an sawipui

Mizoram People Forum (MPF) chuan nimin khan BJP, Mizoram Pradesh pisaah 'Good governance' tih thupui hmangin hun an hmang a; sorkar ṭha siam tura ṭan lak dan turte an sawiho.

He hunah hian MPF aṭangin MPF gene-ral secretary Rev.Dr R Lalbiakmawia, Rev. B Sangthanga, Upa C Sang-thanga leh Pachhunga University College-a assistant professor Lal-thlamuana Ralte-te an kal a; BJP aṭangin president Prof. JV Hluna leh hruaitu dangte an tel.

'Good governance' tih sawitu MPF General Secretary chuan, Mizo-ramah rorelna ṭha a awm theih nan inthlan dawnah party tinte mi ṭha leh rintlak candidate dah turin an ngen ṭhin tih sawiin, "Party tinte'n kan ngenna min zah dersakin mi ṭha tak tak an thlang chhuak ṭhin. Mahse, heti chung hian sorkar ṭha kan tih hi kan la nei thei chuang lo niin kan hria. Mizoramah sorkar ṭha a awm ve ngei theih nan nasa lehzualin hma la ila kan ti a ni," a ti.

Rev.Dr R.Lalbiak-mawia chuan, zu zawrh chu mipui tam berte duhthlanna a tel loh avangin inrâwntlannaa thil tih a ni loa sawiin, "Sorkar ṭha awm tur chuan mipui tam zawkte hriatpuina, tel vena leh pawmpuinaa thil tihhoa hmalakho a pawimawh," a ti .

Lalthlamuana Ralte chuan, vantlang tana hlawh phût loa mahni inpumpek thei kan tlawmngai pawlte hi ram tana hna thawhnaah tihngaihna kan hriat loh tàwpah kan ṭah-awh leh chauh ṭhin. Good governance kan neih theih nan NGO-te leh mipuite hi sorkar hmalakna tur thil tilhhlawhtlin a nih theih nan a bulthûm
aṭanga kan tel ve a ngai. Eirûkna chu system ṭha leh dik hmanga hnawhbo theih a ni," a ti.

Inkawmhonaah hian BJP President leh hruaitu dangte pawhin thu an sawi a ni.

MPF hian 'Good governance' tih thupuia hmangin Mizorama political party hrang hrang hruaitute titipui an tum a; a bul ṭan nan nimin khan BJP hruaitute an titipui a ni.