India Today State of the States Award 2016 Mizoramin award pahnih a dawng
Mizoram chuan India Today-in State of the States Award 2016 a buatsaihah lawmman pahnih a dawng a; award hi Mizoram sorkar aiawhin November 4, 2016 khan Finance minister Lalsawta'n New Delhi-a ITC Maurya-ah a dawng.
Mizoramin award a dawnnate hi state tê (small state) zinga Health category leh Economy category-ah a ni a; heng category-ahte hian state dinhmun insiamṭha ber, Most Improved State Award a dawng a ni.
India rama chanchinbu lâr, India Today hian India rama state-te dinhmun zir chiangin, State of States Awards hi kum tin an buatsaih ṭhin a; kuminah hian an tih dan thlakin, category pahnih - Best Performing States (big state leh small state) leh Most Improved State (big state leh small state) award-te an siam.
Heng hnuaiah hian a pumpuia tiṭha ber - economy, agriculture; health, education, infrastructure, inclusive development, law and order; e-governance, entrepre-neurship leh environment category lawmmante a awm bawk.
Best Performing State lawmman atan hian kum 2013-14-a hna thawh dan leh mawhphurna hlen dante en a ni a; Most Improved State lawmman atan hian kum 2012-13 leh 2013-14 chhunga dinhmunte thlir a ni thung.
State tê zinga Most Improved State award late chu - Puducherry (overall, law & order, agriculture); Mizoram (economy, health); Meghalaya (education); Arunachal Pradesh (infrastructure); Delhi (inclusive development); Tripura (e-governance) leh Manipur (environment)-te an ni.
State tê zinga Best Performing State award late chu - Goa (overall, health, infrastructure); Delhi (economy, inclusive development, e-governance, entrepreneurship); Puducherry (agriculture, law & order), Sikkim (education) leh Meghalaya (environment) te an ni.
Congress party chuan thuchhuah siamin, Mizoramin economy leh health-a award a dawng chu lawmawm an tih thu an tarlang a, "Chief minister Pu Lal Thanhawla kaihhruai Congress sorkar chuan theihtawpa ram tana a thawh rah a seng chho zel a... Hetiang hmasawnna kan nei hi lawmawm kan ti tak zet a, Mizoram sorkar hi kan fak tak zet a ni," an ti.