Sorkarin e-Office a hmang tawh; 'File a kal chak phah' - ICT Minister

Information Commu-nication & Technology (ICT) minister Dr Vanlalthlana chuan, Mizo-ram sorkarin e-Office a hman ṭan tawh thu leh file a kal chak phah thu a sawi.

Dr Vanlalthlana hian nimin khan a pisaah thuthar thehdarhtute a kâwm a; chak leh langtlang zawka sorkar file-te a kal theih nan Mizoram sorkarin e-Office a hman thu sawiin, "January 2024 aṭang khan hmalak ṭan a ni. A bul ṭanna (pilot) atan secretariat-ah tih hmasak a, chumi zawha directorate leh district office-ahte kalpui tura ruahman ni," a ti.

e-Office chu April 18, 2025-ah hman ṭan a nih thu sawiin Dr Vanlalthlana chuan, "Secretariat-a department pali - DPAR (GGT), ICT, School Education leh PWD ten an hmang hmasa a, tunah chuan Secretariat-a department zawng zawng (department 41) bakah, Chief Minister Office-ahte hman a ni tawh," a ti a; e-Office hmangin file 6,492 kaltir a ni a, chu'ng file-te chu vawi 63,565 khawih chet tawh a nih thu a sawi.

ICT Minister chuan, e-office avangin file a kal chak a, file awm reina dawhkan hmuh theih vek a nih thu sawiin, "File pawimawhte in lamah leh zinna thlengin a khawih theih vek a, a bikin minister, chief secretary, secretary leh senior officer-te'n an hmang ṭangkai ṭhin. File bo a awm thei tawh lo a, file kenkual a awm tawh loh avangin confidentiality atan pawh a ṭangkai hle. Lehkhapuan hman a tlem tawh dawn avangin sorkarin sum tam tak a hum thei dawn a ni," a ti.

ICT Minister chuan, e-Office atan sum awm thei ang ang ngaihtuah a nih thu sawiin, "Proposal siam a ni a, Department of Administrative Reforms & Public Grievance hnuaia State Collaborative Initiative Scheme (SCI) aṭangin cheng vbc. 1.99 chu October 11, 2024 khan hmuh a ni," a ti a; Ministry of Electronic & IT-in kum 3 chhung atan hmarchhak leh Jammu & Kashmir leh Ladakh-te tan e-Office license leh hosting man a tum tur thu an dawng tih a sawi.

Mizorama eOffice kalpui turah DPAR chu nodal department a ni a, implementing department chu ICT a nih thu sawiin Minister chuan, "Tuna e-Office atana kan software hman hi NIC siam a ni a, deployment leh hosting hi RailTel lam tih a ni," a ti.

Dr Vanlalthlana chuan, DARPG aṭanga cheng vbc. 1.99 an dawn chu computer leh a kaihhnawihte lei nan te, training leh e-Office kalpuina senso hrang hrang atan hman mek a nih thu sawiin, "Secretariat building-a IT infrastructure pawh thuam ṭhat mek a ni," a ti a; internet ṭha a pawimawh avangin 1 Gbps back-up line bakah, BSNL aṭangin redundant line tur 1 Gbps dark fiber nei tura hmalak a nih thu a sawi.

December 10, 2024-ah stakeholders kick-off meeting neih a ni a, e-Office kalpuina tura document ṭulte chu NIC leh Railtel-ah pek nghal a nih thu sawiin Vanlalthlana chuan, "e-Office implementation chu Secretariat bik atan chuan bul ṭan chhoh a ni," a ti.