Bána Kaih hnuaiah mi 51 hnenah bank-te'n loan an pe chhuak tawh

Bána Kaih (Handholding) scheme thawh khatnaah loan dilna 11,438 a lut a, chu'ng zinga ṭanpuina dawng tur (progress partner)-a pawm tawh leh bank lama lut tawh 517 zinga 51 hnenah bank-te'n loan an pe tawh.

Mizoram State Policy Coordination Committee chuan chief minister Lalduhoma kaihhruaiin nimin khan CM conference hall-ah Bána Kaih (Handholding) hnuaia progress partner-te tana hmalak mek dan an thlirho.

Ṭhutkhawmah hian thlai leh ran insurance company-te'n felfai zawka an scheme-te an kalpui theih nan a ṭul anga hmalak an rêl bawk.

Meeting-a tarlan danin, Bána Kaih scheme thawh khatnaah loan component-ah dilna 11,438 a lut a, line department-te'n dilna 588 pawm tawhin, pawmsak tawh DPR siamsak ngai 1,687 an awm. Endik hmabak 8,249 a awm a, dilna 914 erawh chu hnâwl a ni. Dilna hnâwlte chu dil dan dik hrilh a, diltir leh vek dan dap zui tura tih a ni.

Dilna pawm tawh zinga 517 chu bank-ah a lut tawh a, bank-a lut tawh zinga mi 51 hnenah bank-in loan an pe tawh. Loan pek chhuah a la tlem chhan chu - loan an hmuhna tam ber PMEGP portal a chian loh vang a ni a, tun hnaiah a ṭha leh tawh a, chak zawka loan an pek theih tawh an inbeisei.

Loan component bikah hian hmalakna tura sum an mamawh tur dik tak aia tam loan dil an tam avangin line department leh bank lam tana pawm harsa a awm ṭhin a; central scheme-te nena kal kawp (convergence) a nih avangin an dilna scheme-in a phalsak chin aia tam loan pawmsak chu harsa an ti a ni.