Zoram Entu Meichher Seminar buatsaih

Education department-a Adult Education Wing-in thla tina chanchinbu an tihchhuah ṭhin 'Meichher' kum 50 tlin, golden jubilee lawm nan School Education department chuan ninin khan directorate conference hall-ah Zoram Entu Meichher Seminar an buatsaih.

Zirhona hmanpuitu School Education director Angela Zothanpuii chuan, Meichher chanchinbu thiltumte chu nghet taka an vawn reng thu sawiin, "Meichher golden jubilee lawm kumah Mizoram ziak leh chhiar thiam vekna full literacy-a puan a ni ta hi Meichher thil tum hlawhtlinna ropui tak a ni," a ti.

Seminar-ah hian F Vanlalrochana buatsaih 'Meichher tihlutute' tih te, Helen Lowry College assistant professor Dr C Lalawmpuia Vanchiau ziah 'Mizo literature atana Meichher Magazine hlutna leh ṭangkaina' tih te, Mizo Language Development Board chairman R Lallianzuala ziah 'Mizoram zirna atana Meichher Magazine ṭangkaina' tih leh, Dr H Laldinmawia, PUC ziah 'Meichher Magazine zirchianna' tihte zirho a ni.

Meichher chanchinbu hi a tirah 'Zoram Eng' tih niin, chhuak hmasa ber chu kum 1975 March & April thla chhuak a ni a; October 1975 thla chhuak aṭangin 'Meichher' tih a ni. March & April 1975 aṭanga June 2025 thlengin bu 808 a chhuak tawh.