Rs 500 & 1,000 note thih vangin A hman theih loh tihna a ni lo
Sorkar laipui thupek anga Rs. 500 leh Rs. 1,000 tlang (note) tihthih a nih avangin Mizoramah Rs. 500 leh Rs. 1,000 tlang hman a harsat phah. Hetih lai hian, State Bank of India (SBI) hotute chuan, Rs. 500 leh Rs. 1,000 hman leh dawn a pawina a awm loh thu an sawi a; Finance minister Lalsawta pawhin harsatna a awm rei a rin loh thu Vanglaini a hrilh.
Prime minister Narendra Modi-a'n November 8, 2016 zanah November 9 aṭanga Rs. 500 leh Rs. 1,000 note a thih tur thu a puan hnuah Mizorama dawr hrang hrangte chuan heng pawisa note-te hi an dawng duh lo a, mi tam takin harsatna an tawh phah. Rs. 500 leh Rs. 1,000 dawng duh dawr engemawzat awm mah se, anmahni dawrtute'n Rs. 500 leh Rs. 1,000 zel an ken avangin pawisa kîr turah harsatna an tâwk a ni.
SBI thu leh hla
Vanglaini palai zawhna chhangin SBI hotute chuan, Rs. 500 leh Rs. 1000 tlang hi tih thih ni mah se, December 30 hma chuan account-a dah luh leh thleng theih a nih dawn thu a sawiin, "Pawisa hi thi mah se, mahni account-a dah emaw pawisa danga thleng theih tho a nih avangin dawrkai tan dawn duh lohna chhan tur a awm lo," an ti.
SBI hotute chuan ATM-a Rs. 500 leh Rs. 1000 te chu la chhuakin, pawisa danga thlak a nih dawn thu sawiin, "Bank kan chawlh chhan chu ATM chinfelna hun atan leh pawisa kan dawn sate chinfelna atan a ni," a ti.
Bank-te hi nimin leh vawiin hian inchinfelna atan an chawl a, chumi hnuah bank-te hi dawr zui leh theih nghal an ni ang.
Rs. 500 leh Rs. 2000 siam thar bakah Rs. 100 tlang phur tura an inbuatsaih mek thu sawiin SBI hotute chuan, "Kan phur thlen hun tur chu security thil avangin sawi lawk chi a ni loa, mipui tan chi-aina tur a awm lo," an ti.
Finance Minister thusawi
Vanglaini palai zawhna chhangin Finance minister Lalsawta chuan, Rs. 500 leh Rs. 1,000 note tihthih a nih avangin sorkarin harsatna a tawh a rin loh thu a sawi a, "Mimal lo buai deuh an awm a nih chuan thuhran, sorkar ang chuan buaina tur kan neih ka ring lo. Mimal ang pawhin kan sum lak luhna a dik phawt chuan buaina tur a awm lo," a ti.
Pawisa note tihthih chu ṭha a tih thu sawiin Lalsawta chuan, "Economy, corruption venna leh pawisa chhehrelh venna piah lamah, ram venhimna atan thil ṭha tak a ni. Pawisa lem hi hriat chian tâwk loh vanga hmang tâwk an awm reng a, hetiang a nih chuan ram ṭhenawmte'n pawisa lem hmangin ram venhimna lamah pawh harsatna an siam thei," a ti a; pawisa reng reng a hlutna nen a inbûk tâwk loh chuan economy thlengin a nghawng thei tih a sawi.
Chief secretary leh bank hotute
Pawisa note tihtawp a nih chungchangah hian nimin khan chief secretary Lalmalsawma chuan Aizawla Reserved Bank of India (RBI) leh State Bank of India (SBI) hotute a pisaah a kâwm a; mipui tana harsatna awm lo thei ang ber tura ṭan la turin a ngen.
Thuthar thehdarhtute zawhna chhangin Chief Secretary chuan, "Central sorkarin kalphung a thlak avangin ni hnih/thum chu harsatna a awm lo thei lo a, mipuite chî-âi lo turin ka chah a ni," a ti a; Rs. 2,000 note thar, vawiina tlangzarh tur pawh Kolkata
aṭanga thlawhtheihna hmanga phur mai tur leh Rs. 100 note pawh tam zawk la lût tura bank hotute a hrilh thu a sawi.
Sorkar laipui thuchhuak ang chuan, Rs. 500 leh Rs. 1,000 note-te chu nimin
aṭangin hman theih loha dah ni mah se, sorkar damdawi-in, damdawi dawr, railway ticket counter, sorkar bus, airport-a airline ticket counter, co-operative society, bawnghnute dawr, petrol pump, ration (buhfai, etc.) leinaahte la hman theih tura tih a ni. Chutih laiin, nimin khan Aizawla veng ṭhenkhata bufai retailer-te chuan Rs. 500 leh 1,000 note an dawng duh lo nia thu dawn a ni.
Hriat tur hrang hrangte
4 Bank-te chu an inpuahchah felna atan nimin khan chawlhtir an ni a, vawiinah hawn a ni ang.
4 ATM booth zawng zawng, cash deposit machine, cash recycler, pawisa lut/chhuak sawngbawlna hmunte niminah khar a ni a, vawiinah pawh khar a ni ang.
4 Rs. 500 leh 1,000 note hluite chu December 30, 2016 hmain mahni bank account-a dah emaw, note danga thleng tur a ni. Mahni bank account ni loah chuan identity proof kengin eng bank/post office-ah pawh ṭum khatah Rs. 4,000 aia tam lo a thleng theih. Ni 15 ral hnuah pawisa thleng theih zat ennawn a ni ang.
4 Card pakhat ATM aṭanga pawisa a lak chhuah theih zat chu ni khatah Rs. 2,000 bituk a ni a, November 19, 2016 aṭangin card pakhatin ni khatah Rs. 4,000 a la chhuak thei ang.
4 ATM aṭang ni lo chuan ni khatan Rs. 10,000 leh kar khatah Rs. 20,000 lak chhuah theih a ni a, November 24 hnuah ennawn tur a ni.
4 Pawisa fai tawh chêt ngai loa account khawihna - cheque, demand draft, credit/debit card, mobile wallet leh electronic fund transfer-te a ngaiin a kal reng.
4 Mipuite'n harsatna an pumpelh theih nan November 8, 2016 zanlai aṭanga chhuta darkar 72 chhung chu sorkar damdawi-in, damdawi zawrhna, railway ticket lakna, sorkar enkawl ticket counter, airport consumer, co-operative society, milk booth, public sector oil marketing company enkawl petrol/diesel leh gas station-ahte pawisa hlui pawm tura tih a ni.