'Khawm case' a mante Dahna tur siam a ni

Serchhip Police Station building thar chu nimin khan Home minister R Lalzirliana'n a hawng a, cheng nuai 57.20 sênga sak a ni. Minister chuan, Serchhip PS building thar chu 'khawm case' a mante dahna tur bika siam a nih thu a sawi.

Home Minister chuan, Mizoram Police-te chu India ram state zingah an mi mante thiam loh chantir zat (conviction rate) nei ṭha ber pawl an nih thu a sawi a, "Hei hian an inthlahdah lohzia a tichiang hle. Serchhipah law & order fail sawi tur a awm meuh lo a, in entawn tlak hle a ni," a ti.

Tun hnaiah ruihhlo zuarte'n man tlawm takin ṭhalaite hnena ruihhlo an hralh ṭhin tih sawiin R Lalzirliana chuan, "Zu a ni emaw, ruihhlo eng chi pawh, ruih hrim hrim hi dan kalh a nih avangin tunah hian nasa zawka hmalak zel a ni a, khawm case-a mante dahna tur bik pawk siam niin hawn theih ṭep a ni tawh," a ti a; dan bawhchhiaa ruih chíngte chu sorkarin a ûm zui zel dawn thu a sawi.

HM Zira chuan Krismas leh kumthar lo thleng tur chu, halpuah, halmawi leh silai lem tel loa hman tum a nih thu sawiin, hemi chungchang hi tun aṭanga mipuite hrilh uar turin khawtlang hruaitute a ngen.

Building hawn in-khawm hi Serchhip SP Lalringdika'n a kaihruai a; parliamentary secretary (Home) Lt. Col. ZS Zuala leh DGP Thianghlima Pachuau te pawhin thu an sawi.

Serchhip Police Station building hi a dung ft. 70 leh a vâng ft. 30 a ni a, pindan pariat leh inthiarna pathum a awm a ni.