USA President thar Donald Trump
United States of America (USA) President 45-na turin Republican Party candidate, mi hausa tawntáw Donald Trump chu thlan tlin a ni.
USA President thlannaah hian November 8, 2016-ah vote thlak a ni a, nimin kan vote chhiar a ni. Kum 70-a upa Donald Trump hian electoral college vote 530 aṭangin vote 276 a hmu a; President tling tura electoral vote hmuh ngai zat chu 270 a ni.
Donald Trump hi a term khatna tura President ni thei tur zinga upa ber a ni a; public office-a nihna engmah la chelh lo leh US military-a thawk lo president hmasa ber tur a ni.
Politics lamah hnûhmá a la nei lo a, June 2015-a US President thlannaa Republican party candidate chuh a tum thu a puan aṭangin politics a luhchilh ve chauh a ni.
US President thar tur hi January 20, 2017 chhun dar 12-ah US Capitol, Washington DC-ah lakluh a ni dawn a, chumi hmain vice president atan Indiana govenor Mike Pence chu lakluh hmasak phawt a ni ang. Lakluh a nih hma chuan Donald Trump hi President-elect tia sawi tur a ni.
Tu nge
Donald Trump?
Donald John Trump hi June 14, 1946-ah Jamaica Estates, Queens-ah a piang a, unau panga zinga naupang ber dawttu a ni.
Kum 13 a nihin New York Military Academy-ah a kal a, kum 1968-ah University of Pennsylvania-a Wharton School aṭangin economic-ah bachelor degree a zo.
Kum 1971-ah a pa sumdawnna, Fred Trump's Real Estate and Construction a enkawl a, a hnuah a hming hi The Trump Organization tiin a thlak.
Trump hian nupui pahnih a ṭhen tawh a, a nupui pathumna Slovenia model Melania Knauss nen January 22, 2005-ah an innei. A nupui pathumte lakah hian fa panga a nei a, tu pariat a nei tawh.
Sumdawng lian a nih bakah television producer a ni bawk a, film leh television series-ah pawh a lang ve fo. Reality TV series, The Aprrentice chu kum 2004-2015 chhung khan a tihchhuah bakah a huaihawttu ber (host) a ni a; Miss USA pageant pawh kum 1996-2015 chhungin a huaihawt a, amah pawh a inlan.
Fobres magazine-in kumina khawvel mi hausa a tihchhuahah, Trump hi 324-na a ni pha a, USA bikah 156-na a ni.
Politics lamah a inhmang lo a, mahse June 2015 khan US President thlanna neih tura Republican party candidate a chuh tur thu a puang. Party candidate inchuha Primary Election neiha a chet ṭhat tak avangin May 2016 khan candidate chuh tum dangte chu an inhnûkdâwk vek a; July thlaa Republican National Convention-ah party official candidate atan puan a ni.