KHAWTHLIR

Sikul hawng

Sateek khuaa St. Francis de Sales School building thar chu nimin khan bial­tu MLA KS Thanga'n a hawng. KS Thanga chuan, Sateek leh ṭhen­awm khuate'n an chhawr ṭangkai theih tur Catholic missionary-te'n sikul an din chu lawmawm a tih thu a sawi.

E.Roll sawiho

Lawngtlai district election observer Lalthangpuia Sailo chuan, nimin khan Lawngtlai Circuit House-ah political party hrang hrang aiawhte a kâwm a; electoral roll ennawnna kal mek chhungchang a sawipui.

AMWF

All Mizoram Women Federation (AMWF) chuan nimin khan IPR auditorium-ah khawmpui an hmang a, thil pawimawh hrang hrang an sawiho bakah hruaitu thar an thlang a, president-ah Dr. Jane R Ralte thlan nawn a ni.

Ruihhlo do tan

Zemabawk leh a chheh­vel veng hrang hranga ruihhlo do tura din, Undivided Zemabawk YMA Joint Operation Squad chuan Thawhlehni zan aṭang khan ruihhlo do beihpui an thlak ṭan a, Central YMA vice president Vanlalruata'n Ṭhuampui YMA hall-ah beihpui thlak a hawng. Zemabawk YMA Joint Operation Team-ah hian tun hma lama Zemabawk huam chhunga awm ṭhin veng hrang hrang Zemabawk, Zemabawk North, Zuangtui, Muanna veng, Falkland, Thuampui, Tui­rial leh Airfield Branch-te an tel a ni.

SEC thukhawm

Synod Executive Committee (SEC) chu nimin khan Synod Office-a JM Lloyd Hall-ah an ṭhu a, Synod moderator Rev. H Lalrinmawia'n a kaihruai. Meeting-ah hian Mizoram Synod leh KAPC Synod thuthlung ennawn te, Presbyterian Church of Myanmar nena thawh dunna ennawn rawtna te, PCI executive member pakhat ruat thar tur te, Evangelical Church of Maraland KTP leh CKṬP inpalai tawn te, Synod Nomination Committee member ruat chungchangte leh fa pali leh a aia tam neite ṭanpuina pek chung­changte an rêl a ni.