Court-a chak loh vanga sorkar sum pek A ngai thin hi a rilru natthlak - Lalsawta
Law & Judicial minister Lalsawta chuan, Mizoram sorkara sum chhûn luhte zangnadawmna atan leh Court-a sorkar a chak loh vanga pek chhuah a ngai ṭhin chu rilru natthlak a tih thu a sawi.
Nimina Court case bik file khawihtute puala Law & Judicial department leh ATI ṭangkawpin ATI Auditorium-a training an buatsaihah thu sawiin Lalsawta chuan, "Mizoram sorkara sum chhûn luh awmchhunte zangnadawmna leh Court case-a chak loh vanga pek chhuah a ngai ṭhin hi a rilru natthlak tak zet. Court case-a sorkar a chak theih nan Court hniam zawk, case ngaihtuahna hmasaah sorkar ukilte theihtawpa puih an ngai a ni," a ti.
Law & Judicial Minister chuan, dealing assistant leh dealing official-te'n lehkha pawimawh kimchang tak, a bo a bâng awm lo leh file kal-phung kimchang taka kalpui chunga sorkar ukilte an ṭawiawm phawt chuan, sorkar tan chak lohna tur chhan leh vâng a tam loh thu a sawi.
Court hniam zawka lehkha thehluh bak lehkha dang Court sang zawkah thehluh a theih tawh loh tih sawiiin Lalsawta chuan, "Court hniam zawka chetchhiat tawh chuan Court sang ber Supreme Court-ah pawh dinhmun ṭha neih a harsa," a ti a; dealing official-te chu Court case kaihhnawihah ṭan la thar leh tur leh fimkhura sorkar tan
ṭhahnemngai turin a chah.
Law Minister chuan, minister leh MLA-te chu sorkarna neitu, mipuite'n an aiawh tura an thlan an nih angin, an tana hna pawimawh ber chu ram hmasawnna atan leh mipui ham-ṭhatna tura dan siam a nih thu a sawi a, "Mizoram sorkarin hma a sawn nasat zawk nan dan ṭha zawk leh ṭangkai siam chhuah kawngah sorkar hnathawkte'n minister leh MLA-te thurâwn pek nacháng an hriat a ngai," a ti.
Training-ah hian disciplinary proceedings vis-a-viz court cases, action on report of inquiry officer and penalties-in disciplinary proceeding, basic step & strategy to be adopted in dealing with Notices/Court cases at the level of sub-ordinate courts, High Courts & SC Level, basics on legislative drafting (policy ordinance, rules, acts) and drafting of MOUs agreements on behalf of the government leh general role and responsibility of nodal officers, superintendents, dealing assistants i/c court case-te an zir a ni.