J Thankima College-in college ram an hung

J Thankima College zirlaite chu nimin khan an college hmun tura Bawngkawn Brigade rama sorkarin ram a pekah an hnatlang a, an college ram chu mimal ṭhenkhatin an chuhpui avangin an college ram chin an hung.

Hnatlan ṭan hmain inkhawm tawi an buatsaih a; MZP, MSU, Aizawl City College Joint Students’ Union, Bawngkawn Local Council, Bawngkawna pawl hrang hrang - YMA, MUP leh MHIP hruaitute'n an telpui a, pawl aiawhte'n thu an sawi. Inkhawmah hian resolution an pass nghal a ni.

J Thankima College zirlaite chuan, an college ram chu Mizoram sorkârin a pek a ni tih sawiin, "College awmna tur ram hi Secretary to the Govt. of Mizoram, Higher & Technical Education hminga dah a ni a, a zau zawng pawh square metre 8,519.50 a ni," an ti.

Inkhawmah hian J Thankima College principal Ramhmangaiha Ralte-in thu sawiin, Mizoram sorkarin an college tana ram a pek bakah, Brigade chhunga kawngpui blacktop tura ruahmanna a siam fel tawh avangin lawmthu a sawi. Associate professor Lalthlamuana pawhin, "Mizoram sorkar leh zirlaite, Bawngkawn khawtlang mipuite awkáin awmzia a neih tâwk loh avangin ram chin humhalha hmalak a ngai ta a, a tawp thlengin kan ṭang ang,' a ti.

Bawngkawn LC chairman LH Tharzela chuan, sorkarin Brigade hmun chu sorkar hmun pawimawh atan a ruat angin Bawngkawn veng chuan an humhalh tlat tih sawiin, college sakna tur hmun bak, tu hnenah mah No Objection Certificate (NOC) an pek chhuah loh thu a sawi.

Bawngkawn YMA president K Lalrinawma pawhin, Brigade hmun chu sorkar hmun pawimawh a nih avangin dan loa hmun chuhtute chu inthiar fihlim tur leh Bawngkawn khawtlang nék lui lo turin a chah a ni.

J Thankima College resolution

1. Mizoram sorkârin zirna hmasâwn nân Bawngkawn Brigade ramah J Thankima College tân ram a pêk avangin lawmthu kan sawi e.

2. Bawngkawn Brigade hmuna Mizoram sorkârin zirna in ṭha nei tura J Thankima College ram a pek hi theihtawp chhuahin kan humhalh ang.