Hamsapara-ah Bru enfiah a ni

Mizoram aṭanga Bru ráltlân, Tripura transit camp-a awmte Mizorama hruai kîr tumnaah nimin khan Hamsapara camp-a Bru-te Mizoram mi leh sa an nih leh nih loh enfiah leh an ni a; mi 1,313 enfiah an ni.

Thu dawn danin, nimina Hamsapara camp-a Bru enfiahnaah hian Mamit, Kolasib leh Lung-lei aṭanga identification team kalte'n an enfiah a, chhungkaw 261-a mi 1,313 anfiah an ni.

Enfiah zinga chhungkaw 252-a mi 1,265 chu Mamit district-a mite an ni a, puitling 807 leh naupang 458 an ni. Chhungkaw pariata mi 46, puitling 27 leh naupang 19 chu Kolasib district-a mi an ni a; Lunglei district-a mi chhungkaw pakhata mi pahnih (puitling ve ve) an tel bawk.

Nimina Hamsapara-a mite enfiah an nih lai hi North Tripura district magistrate Dr Sandeep Mahatme chuan a tlawh a, hna thawh dante a enpui. Hamsapara-ah hian vawiinah enfiah hna chhunzawma zawh tum a ni ang. Bru enfiah nan hian kum 1995-a electoral roll hman a ni.