YMA thurêl bawhzui dan tur sawiho

YMA-a rorelna sang ber dawttu, Central Coordination Committee chu nimin khan Central YMA Hall-ah an
ṭhukhawm a; Octoberber 20, 2016-a R Dengṭhuama Indoor Stadium-a YMA Rorel Inkhawma an thurelte bawhzui dan tur an sawiho.

Meeting hi CYMA president Lal-biak-zuala'n a kaihruai a; YMA rorel inkhawm neih tak chu lungawithlaka an ngaih thu a sawi lan rualin, hmasawnna tur erawh chu a awm nual thu an tarlang a, YMA rorel inkhawm thuchhuakte chu YMA Central Executive Committee (CEC) bawhzui atan an dah.

CEC bawhzui turte chu - Central service-a Mizo a tam thei ang ber an luh theih dan tur te, Mizoram hmun hrang hranga pípúte hmun hlui leh sûlhnûte a nihphung hloh loa humhalh dan tur te, Mizoramin Trading Regulation Act ṭha leh fel zawk a neih theih dan turte leh Zo hnahthlakte inpumkhat leh zual theih dan turte a ni.

Sorkar khawih thilah chuan, Mizo hnam ziaráng leh hnam lâmte YMA member náwlpuiin an thiam theih nan zirna in hrang hranga zirtir chungchang te, luia nungchate humhalhna dan a awm theih nana sorkara thlen te, State Referal Hospital bul hnaia damlo enkawltute tan khualbûk sa tura sorkara ngente leh, Inner line Permit chungchangah kalphung fel zawk a awm theihna tura sorkara thlen dan turte a ni.