Mizoramah ruihhlo dona ní hman a ni; Cheng nuai 15,107.22 hû ruihhlo hâl

Nimin kha ruihhlo dona ni, International Day Against Drug Abuse & Illicit Trafficking a ni a; Mizoram hmun hrang hrangah hman a ni. Ruihhlo dona ni-ah hian Mizorama hmun pathumah cheng nuai 15,107.22 hû ruihhlo an hâl ral.

International Day Against Drug Abuse & Illicit Trafficking-ah hian Excise & Narcotics department chuan Muallungthu ramah ruihhlo hal râlna hun an hmang a, END commissioner Z Lalhmangaiha'n a kaihruai. Ruihhlo man sa, court-in dan anga a chinfela tihral a phal tawh Rs 20,24,77,472.33 hû hâl ral niin, Lunglei West bialtu MLA T Lalhlimpuia'n a dep/hâl kai a ni.

Ruihhlo hâlna inkhawmah hian END deputy commissioner Ngurthanzama Sailo-in report a pe a; ruihhlo hâlte chu heroin, ganja, methamphetamine, crystal meth, alprazolam, nitrazepam, codeine (khuh damdawi), clonazepam leh tramadol te a ni.

Ruihhlo hâl ral tâka thubuai awm zat chu - Aizawlah thubuai 104, Lungleiah 58, Siahaah 16, Champhaiah 13, Kolasib-ah pahnih, Lawngtlaiah pakua leh Mamitah 23 a ni.

Mizoram Police pawhin nimin khan DIG (CID) Dingluaia hoin ZMCH, Falkawna incinerator-ah ruihhlo cheng vbc. 13.79 hu an hâl ral.

ZMCH-a Police-te'n ruihhlo an hâl ralte chu heroin kg. 8.224, cheng nuai 246.72 hûa chhût te, methamphetamine kg. 87.07, cheng vbc. 11.31 man hûa chhût leh, ganja kg. 118.538, cheng nuai 1.16 hûa chhûtte a ni.

Nimin vek khan Champhai District Drug Disposal Committee chuan ruihhlo Rs 1,17,03,45,500 (nuai 11,703.45) hû an hâl ral a, Champhai bawrhsap Mohammad Aaquib-a'n a hmanpui.

Champhaia ruihhlo hâl ralte hi Champhai Police-te'n June 2024 leh April 2025 inkara ruihhlo an man, court-in a chinfel tawhte a ni a; heroin kg. 24.841 (Rs 7,45,23,00 hû), meth-amphetamine kg 249.125, (Rs 32,38,62,500 hû) leh crystal methamphetamine kg. 25.834 (Rs 77,50,20,00 hû) te a ni.

Kumina International Day Against Drug Abuse & Illicit Trafficking thupui chu thupui chu 'Breaking the chains: prevention, treatment and recovery for all' (Ruihhlo khaidiat chhut chah: mi tin tana invenna, enkawlna leh tihdamna) tih a ni. Day hi nimin khan district hrang hrangah END bultumin hun hman a ni a; sikul, NGO leh hmun remchang dangahte drugs awareness campaign neih a ni bawk.

United Nations bultumin kum 1989 aṭang khan kum tin June 26-ah International Day Against Drug Abuse & Illicit Trafficking hman a ni a; damdawi ruihhlo hman khawloh leh tawlhruk dona ni atan leh ruihhlo ṭhat lohzia inzirtir ni atan hman ṭhin a ni.