Gas sem dawnah bûk leh ngei tur

Food, Civil Supplies & Consumer Affairs (FCSCA) department chuan thuchhuah siamin, eirawngbawlna gas sem dawnah bûk leh ngei ngei tur a ni tih an tarlang.

FCSCA department chuan, order an chhuah tawh ṭhin angin LPG distributor-te'n gas an pek chhuah/sem dawnah Marketing Discipline Guidelines-in a phût angin, gas bûr tak awm bûk dik tak chauh an phur chhuakin bûkna dik thlap an keng tel ang a, customer hmuh lai ngeiin a dik leh dik loh an bûk leh tur a ni' tih chu an zawm ngei tur a ni tih an tarlang a ni.

Gas bûr ruak rih zawng a bûrah a inziak tih tarlangin FCSCA chuan, "Domestic LPG lak dawn chuan a bûr rih zawng inziak leh kg. 14.2 belh (e.g.14.2+15 = 29.2 kg) tur a ni. Amaherawhchu, Liquified Petroleum Gas (Regulation of Supply and Distribution) Order 2000, clause 5-in a sawi angin, a rih zawng tur dik tak aia gram 150 pêl loa a zâng emaw, a rit emaw zawk a nih chuan ngaihhnathiam tur a ni," an ti.

FCSCA department chuan, tunlaiin mi ṭhenkhat, gas an book tih pawh hre lote hnenah delivery authentication code (DAC) a thleng ṭhin tih hriat a nih thu tarlangin, "DAC hi gas dawn hunah chauh gas distributor-te hnenah pek tur a ni. DAC pek loha delivery report dawn pawh phal a ni lo," an ti a, thil serious tak a nih thu an tarlang.

DAC pek loha delivery report dawn a nih chuan an hriat lohin tute'n emaw an hmingin gas an lo book tihna a nih thu tarlangin FCSCA chuan, "Hei hian a nghawng chu kum khat chhunga subsidy-a gas an lak theih zat a titlem dawn. Chuvangin, hetiang thil tawkte chuan IndianOil ONE application aṭangin complaint theih a ni a, FCSCA dept.-ah pawh thlen theih a ni," an ti.