District hrang hrangah ruihhlo dona ni hman a ni

Nimin khan Mizorama district hrang hrangah ruihhlo dona ni, International Day Against Drug Abuse & Illicit Trafficking hman a ni a; ruihhlo ti lo tur leh ruihhlo do tura intiamna thu sawi rual a ni.

Lungleiah chuan District Ruihhlo Do Campaign hnuaiah ruihhlo do kawngzawh, 'Walkathon: Walk Against Drug Abuse' buatsaih a ni. Sorkar department hrang hranga thawk te, YMA leh village defence party (VDP) hruaitu te, pawl hrang hrang leh kohhran ṭhalai pawl aiawh te, Lunglei High School, Baptist Higher Secondary School leh J Buana College zirlaite leh NCC cadet-te an tel.

Lungleia kawngzawh hi hmun pahnih aṭangin ṭan a ni a; Kikâwn aṭanga kalte chu bawrhsap Navneet Mann-i'n vailiamin, AOC kâwn aṭanga kalte chu SP J Lalmuankima'n a vailiam a, Lunglei Venglaia Old Tennis Court-ah intâwk khawmin, inkhawm tawi buatsaih a ni.

Siahaah chuan District Level Nasha mukt Bharat Abhiyaan (NMBA) huaihawtin Saiha College seminar hall-ah hun hman niin, additional DC Abraham Beirazi Khithie-in a hmanpui a; Siaha DSWO LS Lalbiakzuali'n a kaihruai.

Champhaiah pawh ruihhlo dona ni pualin ruihhlo do kawngzawh buatsaih a ni a, Vengsang biak-in kawtah ṭanna inkhawm tâwi neih a nih hnuah Champhai SCO (Sadar) Ngulzaṭhuama'n a vailiam.

Kawngzawh bul ṭannaa inkhawmah Champhai SP R Lokeshwaran chuan, Champhai district chu Myanmar ramria awm a nih avangin ruihhloin a chiah hneh bik tih sawiin, "Ruihhlo kan rama rawn lutte hi dan leh thupek kengkawhtute mawhphurhna chauh ni loin, mipui mawhphurhna pawh a ni a, ruihhlo donaah mipuite ṭanho tlat kan mamawh," a ti.

Serchhipah chuan International Day against Drug Abuse & Illicit Trafficking pualin Serchhip SP hmalaknain Two Wheeler Rally huaihawt a ni a; Sailiamkawn aṭanga bul ṭanin, SP pisa tual thleng an tlan. SP kaihhruaiin kal khawmte'n ruihhlo do tura intiamna an sawi rual a ni.

Ruihhlo dona ni hi Khawzawlah chuan DC Office, NMBA leh NCORD huaihawtin Zaingen YMA Hall-ah hman a ni a; Khawzawla high school leh higher secondary school zawng zawng bakah, sorkar department hrang hrang hotu te, tlawmngai pawl aiawhte an tel.

International Day Against Drug Abuse and Illicit Trafficking pualin nimin zing khan Excise & Narcotics department chuan Hnahthialah kawngzawh an huaihawt a; END-a thawkte leh Hnahthial H/S leh Hnahthial HSS zirlaite an tel.