Tui pût report-na hmang ṭangkai turin mipui chah

Public Health Engineering (PHE) minister Prof. Lalnilawma chuan, PHE department enkawl tui pipe aṭanga tui pût report-na tura siam, ‘Water Leak Reporter’ mobile application chu hmang ṭangkai turin mipui a chah a, report lutte bawhzui nghal zel a nih thu a sawi.

PHE Minister hian nimin khan Assam Rifles chhuahsan tak Lammual leh a chhehvel hmun ṭhenkhata tuihna awmna te, Hunthar Venga lei tlahniama tui pûtna leh Helen Lowry School hmeichhe hostel-a tui pipe thawm ṭhat ngaite a hmunah a enfiah a; PHE department hotu te, Aizawl DC pisa aiawhte leh khawtlang hruaitute'n an ṭawiawm.

Prof. Lalnilawma chuan, PHE department pipe aṭanga tui pût hriate tan ‘Water Leak Reporter’ app hmangin awlsam takin PHE department-ah report thehluh theih a nih thu a sawi a, "Report thehluh aṭanga hun rei lo têah thawktute’n pipe aṭanga tui pûtnate thawm ṭhat hna an bawhzui nghal ṭhin. He mobile app hi ṭangkaitu nih tum ṭheuh turin Mizoram mipui ka ngen a ni," a ti.

Lammual chhehvela tuihna ṭha tak awm chu mumal taka hmalakna a awm loh chuan a bul hnaia inte tan chhiatna a thlen thei tih sawiin Minister chuan, "Tui khawl khawmna tur mumal tak siam a, vantlang tana hman ṭangkai theih tura ruahmanna kalpui a ṭul," a ti a; lei tlahniam vanga PHE pipe kal dan siamṭhat ngaite pawh department thawktute nen enhoin, hmalak dan tur an sawiho a ni.

PHE Minister hian Hunthar Veng lei tlahniam leh Helen Lowry School-a tui pûtna hmun a endiknaah, harsatna lian zawk a thlen loh nan leh khawtlang him nan tui luan kawr ṭha siam chu ngaih pawimawh hmasaah neih a ṭul thu a sawi bawk.