Meichher kum 50 tlin lawm a ni

School Education department hnuaia Adult Education Wing-in an tihchhuah 'Meichher' chanchinbu kum 50-na, golden jubilee chu nimin khan Vanapa Hall-ah lawm a ni a, Education minister Dr Vanlalthlana'n a hmanpui.

Education Minister chuan, Meichher chanchinbu chu ram hmasawnna mei hliau kaia chhêm alhtu hlu tak a nih thu a sawi a, "Kum upate hnena ziak leh chhiar zirtirna hmanraw ṭangkai tak a ni. Meichher chanchinbua thu leh hla lama mi ropuite sûlhnu chhiar tur tam tak a awm hi a hlu hle a ni," a ti.

Ziak leh chhiar thiamah duh tawk mai lo a, hma lam hun ngaihtuah chunga sum enkawl leh peipun dan (financial literacy) thiam tuma ngaihven a ṭul thu sawiin Dr Vanlalthlana chuan, mahni inhai kuak tum tur leh mithiam zawkte ráwn hreh lo turin kal khawmte a chah.

Meichher editor hmasa ber R Lalrawna, Padma Shri chuan bul an ṭan dan leh an hmalak dante a sawiin, "Meichher hi ziakmite nena thawhhona ṭha leh ram hmasawnna atana ṭhahnemngaihna rah a ni," a ti a; Meichher chanchinbuin kum 50-na hmel a hmu ta chu ropui a tih thu a sawi.

Meichher editor TC Lalremsiama tarlan danin, Meichher chanchinbu hi a tirah 'Zoram Eng' tih niin, chhuak hmasa ber chu kum 1975 March & April thla chhuak a ni a; October 1975 thla chhuak aṭangin 'Meichher' tih a ni. March & April 1975 aṭanga June 2025 thlengin bu 808 a chhuak tawh. Publisher atan Education Director hman ṭhin a ni.