Kolasib-ah DAJGUA campaign ṭan

Dharti Aaba Janjatiya Gram Utkarsh Abhiyan (DAJGUA) Awareness and Benefit Saturation Campaign chu June 25, Nilaini khan Kolasib district-a kalpui turin Assembly deputy speaker Lalfamkima, bialtu MLA-in a vailiam.

DAJGUA hi sorkar laipuia Ministry of Tribal Affairs bultuma tribal-te tana hmasawnna huapzo leh nghet zawk a thlen theihna tura hmalakna a ni a; Kolasib district-ah hian June 25-27, 2025 chhungin khaw 12-ah line department-te'n DAJGUA campaign an buatsaih dawn a ni.

Kolasib DC pisa tiala campaign vailiamnaah inkhawmah Lalfamkima chuan, sorkarin tribal-te hmasawnna turin hma a lak zel thu sawiin, "Kolasib district-ah pawh tribal-te hmasawnna turin sorkarin hmalakna a neih belh zel. Tribal Development Agency building pawh a ram tihfel vek tawh niin, hna ṭan mai theihin a awm a, Social Welfare aṭangin Old Age Home hmunhma tur ngaihtuah mek a ni," a ti.

Lalfamkima chuan, zirna ngaih pawimawh a ṭul thu sawiin, "Zirna lamah ṭhalaite an tuihâl tâwk lo emaw aw tih cháng ka nei. He lamah hian ṭan kan lak a pawimawh takzet a," a ti a; Kolasib district-a sikulte chu a theih ang anga tlawh kual vek a tum thu a sawi.

DAJGUA hian sorkar laipuia ministry 17-te thawhhona (specific intervention) 25 a huam a, state tin leh union territory tina khaw 63,000-a tribal mipui hnena direct-a hamṭhatna leh service hrang hrang pekna tur hmanrua niin, tribal mi nuai 500 chuangte'n an hlawkpui thei tura ngaih a ni.