KHAWTHLIR

SEC ṭhukhawm mek

Synod Executive Committee (SEC) vawi 313-na chu June 25, Nilaini khan Synod Office-a JM Lloyd Hall-ah ṭan a ni a, nimin khan chhunzawm niin, vawiinah zawh a ni ang. SEC ṭhutkhawm hi synod moderator Rev. RC Lalnghakliana'n a kaihruai a, member 136 an tel. SEC-ah hian agenda 57 a awm a; Bairabi Presbytery thar hawn a nih thu te, PC Wales General Assembly hmanpui tura sawmna dawn a nih thu te, Synod Hospital tan Magnetic Resonance Imaging (MRI) khawl thar lei a nih thu leh Nephrology Ward thar hawn a nih thu te, Vanlalngaia'n Synod hnenah ram a pek thu te, Mizoram Presbyterian Kohhran leh Presbyterian Church of Myanmar thawhhona atana Partnership Working Committee din a nih thute tarlan a ni.

Dawr endik

Hnahthial SP Shivam Siddarth leh district education officer H Sangthangate chuan nimin khan Cigarettes and Other Tobacco Products Act (COTPA), 2003-in thuneihna a pek angin, zirna-in aṭanga yard 100 chinah vaihlo lam chi (tobacco product) zawrh a awm leh awm loh an endik. Zirna-in aṭanga yard 100 huam chhunga vaihlo aṭanga siam thil zawrte chu pawisa an chawitir a ni.

Mizoram UPC rorel

Mizoram UPC rorelna sang, Executive Committee kum chanve ṭhutkhawm chu June 25, Nilaini khan ṭan a ni a, nimin khan zawh a ni. Mizoram UPC Executive Committee hian media department lama thawktute lak luh dan tur, recruitment rules siam thar te, vehicle rules, service rules leh Apostolic Theological Institute inkaihhruaina dan siam tharte an pawm a ni.

Minister-in kawng siam tur a enfiah

Aizawl West-II bialtu MLA Lalnghinglova Hmar, minister of state hoin nimin khan a bial chhung Tuikual North A-Mual, veng mawng ping ni ṭhin, Khatla veng nena lirtheia inkalpawh theihna tura kawngpui siamna tura ruahmannate a hmunah PWD hotute nen enfiah a ni. Lalnghinglova Hmar chuan, kawng siam theih a nih chuan Aizawl khaw chhunga traffic jam ṭhin pawh nasa taka a chhâwk ngei a beisei thu a sawi a, "Tihhlawhtlin a nih thuai theih nan hmalak mek a ni," a ti.