Khawchhak lam ramri an véng ngawrh Myanmar aṭanga rawn luh tum an tam lo

Champhai district-a ramri dep khaw hrang hrangte chu Myanmar aṭanga Mizorama lut an awm lohna turin an duty ngawrh hle a, khaw eng emaw zat chuan Ṭiau kamah riah chilhin an ramri an vêng ṭhin.

Khaw hrang hrang aṭanga thu dawn danin, Myanmar aṭanga Mizo­rama luh tum an awm meuh lo a, luh tum an hmuhte chu kîrtir leh ṭhin an ni.

Zokhawthar bikah erawh chuan India khua leh tui, inkhàrkhip puan vanga tangkhang rawn lêt tum an awm ṭhin a, chu'ng mite pawh chu kîrtir leh ṭhin an ni. Khaw hrang hranga duty-te chuan ruihhlo lâk tum emaw, tawlhrûk tum emaw an hmu ngai lo.

Champhai bawrhsap mawhphurh­na la mektu Mark Lalthanliana chuan Vanglaini palai zawhna chhangin, an district-a international boundary-ah hmun 60 velah duty-na hmun siam a nih thu a sawi a, "Police leh local task force-te'n theihtawp chhuahin ramri an véng a, Myanmar aṭanga rawn luh tumte chu kan dang thei thawkhatin kan hria. Task force lamin sorkar min thawhpui ṭha a, ṭhahnem an ngai khawp mai," a ti.

Mark Lalthanliana sawi danin, Myanmar aṭanga Mizorama luh tum, duty-te'n an mante chu ni 14 chhung khung hran an nih hnuah police-te'n thubuai siamsakin, jail-ah dah an ni.

Zokhawthar aṭanga Vanglaini thu dawn danin, Zokhawthara task force-te chuan hmun 20-ah duty-na hmun an siam a, chu'ng zinga pali chu Ṭiau kamah a ni. Hmun 18-ah darkar 24 chhung an duty a, hmun pahnihah erawh chuan an riah chilh lo. India mi, Myanmar lama tangkhang luh tum an awm leh ṭhin a, mahse, lettir leh ṭhin an ni.

Myanmar aṭanga Mizorama lut lui mi pahnih an man tawh a, chu'ng mite chu ni 14 chhung khung hran an nih hnuah police-in jail-ah an dah. Tunlaiin ruihhlo tawlhrûk tum leh lâk tum an hmu ngai meuh lo.

Vanglaini-in Farkawn aṭanga thu a dawn danin, Farkawn task force chuan hmun paliah duty-na hmun an siam a, chu'ng zinga pathum chu Ṭiau kamah niin, darkar 24 chhung an awm chilh ṭhin. Farkawn paltlanga Myanmar mi Mizorama luh tum an hmu ngai lo. 

Vanglaini thu dawn danin, Vaphai task force-te chu darkar 24 chhung hmun 10-ah an duty ṭhin a, hmun pasarih chu Ṭiau kamah niin, hmun pathum chu khaw chhungah a ni. Myanmar aṭanga Mizoram luh tum an awm lo.

Hetih lai hian, Mizoram luh tum pawh ni chuang lo Myanmar aṭanga Ṭiau luia kal an awm ṭhin a, chu'ng mite chu an hawtir ṭhin. A tìr lamah ruihhlo ngaite Myanmar an kal lohna turin vèn an ngai deuh a, ruihhlo ti ṭhinte khung hran an nih hnuah erawh chuan Myanmar lama kal tum an awm lo.

Tlangsam khaw task force-te chuan hmun pangaah duty post an siam a; Ṭiau kam hmun pathumah leh an khaw dai hmun pahnihah darkar eng lai pawhin an veng ṭhin. Ramri an vèn ṭan tirh lamah ruihhlo ngai ven deuh ngai awm mah se, an puala gospel camping buatsaih a nih hnuah ruihhlo ngai Myanmar lama kal tum ven ngai an awm tawh lo tih Vanglaini palai an hrilh.

Zote aṭanga Vanglaini thu dawn danin, hmun paliah darkar 24 chhung an duty ṭhin. Ṭiau lui kamah duty-na hmun pahnih an siam a, khaw dang nena an inkalpawh theihna kawngah hmun pahnihah an duty bawk.

Inkhàrkhip hlimchhàwnah Myan­mar aṭanga Mizorama luh tum an awm ṭhin a, an tlem telh telh thung. Tun hnaiah mi pali/panga vel luh tum an awm a, an kîrtir leh a ni. Mizorama luh tumte chu Myanmar aṭanga Mizorama hna thawk ṭhinte ni deuh berah an ngai a ni.