CM-in CSR dawng thei nih tum turin Society, NGO leh damdawi-in a chah

Chief minister Lalduhoma chuan nimin khan IPR conference hall-ah Mizoram Corporate Social Responsibility (CSR) Cell leh Confederation of Indian Industry (CII) buatsaih, 'Capacity Building Workshop for NGOs & Implementing Agencies' kharna a hmanpui. CM chuan, society, tlawmngai pawl leh damdawi-inte chu CSR dawng thei (implementing agency) nih tum turin a chah.

CM Lalduhoma chuan, India ramah company lian tak takte CSR sum tam tak hai luh tur a awm thu sawiin, "Fund hmang ṭangkai turin kalphung a awm a, duh duha dil chhuah ngawt theih a ni lo. Dan ang thlapa CSR fund dil thei leh hmang thei kan mamawh hmasa a, chutiang ti thei chu Mizoramah pali/panga kan nei ve tawh," a ti.

CSR hmang thei register agency Mizoramah an tam loh avangin CSR fund an dawng tlem bik nia sawiin Lalduhoma chuan, "Tun thlengin India rama CSR fund dawng tlem ber state kan ni," a ti a; society, NGO leh damdawi-inte chu CSR dawng thei (implementing agency) nih tum turin a chah a ni.

CM Lalduhoma chuan, CSR lama Mizoram hnufualna tihreh nan Chief Minister's Office-ah CSR Cell din a nih thu sawiin, "A tir aṭangin hma an la ṭha nghal hle. CSR chungchang sensitization awareness an buatsaih tawh a, UNDP nena ṭang kawpin Bangalore-ah road show an buatsaih a, talk show-te an huaihawt a, tunah CII nen capacity building programme an nei leh ta a ni," a ti.

Chief Minister chuan, mi náwlpuiin CSR an hriat dan chu company hnena eng emaw thilpek tur - bus, ambulance, hmanrua vel dil a nih thu sawiin, "Hetiang thilpek zuk dil hi chu CSR si per pakhat mai a ni. A aia ropui leh lian, sum hlawm lian tak tak hmanga ram tana chhenfakawm tham kalpui theih a ni. Chutianga ti thei NGO, society, etc. kan ngah phawt chuan kan hai lut chum chum ang," a ti a; zirhonaa tel pawl aiawhte chu dan ang taka tih tur leh neih tur indawtte ṭha taka bawhzuia ûm zui turin a chah.

CSR Cell chairman TBC Lalvenchhunga, MLA chuan, training-a telte chu CSR implementing agency nih tum turin a chah a, "Implementing agency leh CSR donor company-te indawr tawnna tur CSR Matchmaking Platform thar kan siam a, kar leh lamah kan hman ṭan theih kan beisei," a ti.

Inkhawm hi Planning secretary Lalmalsawma Pachuau-in a kaihruai a, Mizorama pawl 51 aiawh an tel. CII Mizoram State Council chairman Lalrintluanga Jahau pawhin thu a sawi a ni.