Aizawlah lei laih khap rih a ni

Aizawl Municipal Corporation (AMC) commissioner Joseph H Lalramsanga chuan kumin July 1 aṭanga October 31 thlengin AMC huam chhungah lei laih, leivûng hmanga khuar hnawh leh a kaihhnawihte tih khap a nih thu a puang.

AMC Commissioner chuan, July 1 - October 31, 2025 chhungin AMC huam chhungah khapna thupek kenkawh ni mah se, chhiatna lian zawk a thlen lohna tura ṭul bik thila hmalak a ngaihnaah chuan AMC Commissioner hnenah dilna thlen theih a nih thu a tarlang a, "Khapna hian thlân laih, chhiatna thleng vanga leimin senghawi leh thenfai ṭula chetna, ṭul bik thil vanga phalna pekte a huam lo," a ti.

Khapna thupek bawhchhiate chu Mizoram Municipalities Act, 2007 Section 137, 374 leh 386 hmangin hrem theih an nih thu AMC Commissioner chuan a tarlang bawk.