Criminal case zatve aia tamah ram dang mi an inrawlh - HM

Home minister K Sapdanga chuan, Mizorama criminal case zatve aia tamah ram dang mi an inrawlh thu a sawi.

Mizoram Police-in an hnathawh thlir letna hun nimina an hmannaah K Sapdanga chuan, intelligent report aṭangin Mizoramah criminal case chi hrang hrang ni tin a pung tih hriat theih a nih thu a sawi a, "Criminal case zahve aia tamah hian ram dang aṭanga Mizorama rawn raltlante an inrawlh. Hetiang a nih avang hian khaw hrang hrang aṭangin police station, out post, beat post leh border post dilna a rawn lut nasa. Police duty post tal din tura ngennate pawh a rawn lut a ni," a ti.

Home Minister chuan, district-a police thuneitute chu an huam chhung khuate'n police station, out post, beat post leh border post an mamawh dan zir chiang tura chahin, "Thingtlang khaw mite aṭanga kohna kan dawn hi kan ngawihbosan a thiang lo," a ti a; mamawhna hmunah mipui himna atan police station, out post, beat post leh border post din turin theihtawp chhuah a ṭul thu a sawi a ni.