KHAWTHLIR

Thisen pe

Durtlang Higher Secondary School chuan nimin khan Synod Hospital Blood Bank-ah thisen pek an huaihawt a; thisen unit 21 an pe a, petute mipa 18 leh hmeichhia pathum an ni.

Khaw hming thlak

Lunglei district-a Bunghmun West khua chu 'Bunghmun' tia thlak rêl a ni. Mizoram sorkara Committee on Naming of Streets, Roads and Villages, June 19, 2025-a ṭhukhawm chuan Bunghmun West khaw hming rawtna an ngaihtuah a; rawtna angin Bunghmun tia thlak an remti a ni.

CYMA-in lawmpui

Central YMA chuan thuchhuah siamin, Mizoram University-in June 26, 2025-ah under graduate exam result a tichhuak leh, mi 3,981 (75.33%)-in bachelor degree an zo chu lawmawm an ti a, zirlai hlawhtlingte an lawmpui thu an tarlang. CYMA chuan, zirlai hlawhtlingte chu an kawng zawh turah ṭhahnemngai taka bei a, ram leh hnam tana chhenfâkawm ni tura duhsakna an hlan rualin, hlawhtling rih lote chu theihtawp chhuah zel turin an chah a ni.

MLA-in hmanpui

Aizawl West-III bialtu MLA VL Zaithanzama chuan nimin khan a bial chhunga JL Higher Secondary School Annual Sports khârna hun a hmanpui. MLA chuan, "Zirna leh sports hi innghêng tlata kal, YMA-in kum puana a hman mek ram leh hnam humhalhna tura thil pawimawh tak a ni," a ti a; zirna leh infiamna hmangin ram tihhmingṭhat, chawimawi leh humhalh theih a nih thu a sawi.

Tihdikna

June 27, 2025 (Zirtawpni)-a chhuak Vanglaini-ah Mizoram University-in under graduate result a tihchhuah chungchanga subject topper-te tarlanah, Education-a topper Sujangty Chorkhy chu PUC tia tarlan a ni a, Mamit College tih zawk tur a ni.

Ṭanpuina hlan

Mizoram Volleyball Association chuan tun hnaia Mizorama leimin tuarte ṭanpuina atana 'MVA Charity Volleyball Match & Charity Show' an buatsaiha sum an hmuh aṭangin nimin khan YMA, Serchhip Sub-Hqrs hnenah Rs. 1,00,000 an hlan. Serchhip YMA hian an huam chhunga leimin tuarte hnenah sum hi an sem dawn a ni.