RIPANS-a seat hauh leh thawktu lak chungchang MSU-in Director sawipui

Mizo Students' Union (MSU) Gen. Hqrs hruaitute chuan nimin khan RIPANS director Dr Sanjay D Sawant a pisaah an hmu a, RIPANS-a zirlaite tana seat hauh (reservation) leh other backwarded classes (OBC)-te pual hnaruak chungchang an sawipui.

MSU hruaitute chuan, RIPANS-a state dangin seat reservation pali an neih chu an hnawhkhah loh chuan Mizoram aṭanga dil zirlaite tan pe ṭhin turin an ngen a; M.Sc. zirna bikah hmun dang zirna-ina an kalpui angin RIPANS Alumni tana seat 30% hauhsak turin an ngen bawk.

RIPANS-a thawktu laknaah OBC tana hauhte chu tihkhawtlai ang deuha hriat ṭhin a nih thu sawiin, pawi an tih thu an sawi a; OBC-te chauhin an dil theih ang chi chu a rang lama notification tichhuak turin an ngen.

RIPANS Director chuan, seat reservation hnawhkhah loh a awm chuan an theih ang anga Mizote tana an kalpui tur thu a sawi a; OBC post hna lak tur awm pawh notification tihchhuah vat a nih tur thuin a lo chhang niin MSU chuan an tarlang.