Mizo Territorial Army awmna atan Kàwmzawlah ram ruahman a ni

Mizo Territorial Army din turah Lunglei Kawmzawla sipai luah ram chhung acre 20-a zauah hmunhma ruahman tum a ni a; ram acre 20 lakna tur hriattirna (preliminary notification) chu June 4, 2025 khan Lunglei District Collector & Deputy Commissioner chuan a tichhuak tawh.

Lunglei DC Navneet Mann hoin nimin khan a pisaah Mizoram sorkar hmalaknaa Territorial Army 'Mizo Company' din tur Lungleia an awmna hmun tur leh mamawhte sawiho a ni a; PHE, Power & Electricity leh Land Revenue & Sttlement department aiawh te, 166 Infantry Battalion (Territorial Army), Home & Hearth, Assam hnuaia 'Mizo Company' officer commanding (OC) Lt Col. Prashant Kakade leh JCO te, DIPRO leh SDC-te an tel.

TA Mizo company awmna hmun atan Lunglei Kawmzawla sipai luah ram chhungah hmun ruahman tum a ni a, ram acre 20-a zau lakna tur hriattirna (preliminary notification) pawh June 4, 2025 khan Lunglei District Collector & Deputy Commissioner-in a tichhuak. PHE department aṭanga tui pekna tur leh PE department aṭanga kawlphetha pekna tur mamawhte chu state sorkarah thlenin, hmalak zui ni se, an ti.