National Statistics Day hman a ni

Nimin kha National Statistics Day vawi 19-na a ni a, thupui chu ‘75 Years of National Sample Survey’ tih niin, Mizoram hmun hrang hrangah hman a ni. Directorate of Economics & Statistics conference hall-a Statistics Day hmanna chu adviser to CM TBC Lalvenchhunga, MLA-in a hmanpui.

TBC Lalvenchhunga chuan, sorkarin data dik leh rintlak a ngaih pawimawh thu sawiin, "A bik takin market intelligent hnuaia department hrang hrang data inang neih a ṭul. Multi Dimension Poverty Index Survey neih a ṭul a, GSDP chhût dan pawh fimkhur taka kalpui a pawimawh avangin thawktute tan training neih tam a ṭul," a ti a; sorkar department-te hlutna chu ram tana an thawh hlawk leh hlawk loh dan aṭanga teh ṭhin tur a nih thu a sawi.

Planning secretary Lalmalsawma Pachuau pawhin thu sawiin, NSS Survey 80th round neih mek a nih thu a sawi a; survey hian social consumption, health, comprehensive modular survey on telecom and education, domestics tourism expenditure survey leh national household travel expenditure-te a huam dawn thu a sawi bawk.

Economics & Statistics director B Lalrinhlua'n department hmalakna hrang hrang a tarlang a; joint director Mary Lalrinchhungi kaih-hruaiin university leh college zirlaite nen technical session neih a ni. Assistant director C Vanlalvena'n ‘75 years of National Sample Survey’ tih thupui a sawi a, sawihona hun hman a ni.

National Statistics Day hi India scientist leh statistician Prof. Prasanta Chandra Mahalanobis (1893-1972) pian ni, June 29-ah hman ṭhin a ni a; kuminah Pathianni a nih avangin nimin khan Mizorama district hrang hrangah hman a ni.