MJA-in damdawi-in sak mek an tlawh

MJA, Mamit District member-te chuan nimin khan Mamit District Hospital sak mek an tlawh a, Health director SR Ngurchamliana hoin damdawi-in hotute nen an inkâwm.

Mamit MJA-te hian June 26, Ningani khan khan CSR aṭanga Mamit District Hospital-in a dawn dialysis khawl pakhat chu Serchhip District Hospital-a hman turin phurh chhuah niin an hria a, Health department hotute a chhan an zawt a ni.

Health Director chuan, Serchhipah khawl hmanna tur hmunhma an tihfel vek tawh bakah, hmangtu tam zawk an nih thu a sawi a; Mamit damdawi-ina an dawn tur a lo la thleng lo nia sawiin, "Serchhip ta tur a lo thlen veleh Mamit District Hospital-ah dah a ni ang. Khawl thar hi a lo thlen vat theih nan leh Mamita dah let leh ngei a nih theih nan keima power pawn theihtawp ka chhuah ang," a ti.

Mamit District Hospital-a deputy medical superintendent Dr Lalrinfela sawi danin, Mamit District Hospital-in dialysis khawl pali a nei a, Serchhip District Hospital-a hman lailawk tura lak chhuah chu pahnih a ni. Dialysis khawl hmang turin RO plan a la ngai a, hospital building thar luah hunah bun theih a ni dawn a, a khawl enkawltu tur pawh training tir a la ngai.

Mamit District MJA-te chuan khawl laksawn tak chu a hnawhkhahna tur a rang lama hmuh leh ngei an beisei thu Health department thuneitute an hrilh.