Vanglaini logo

CADS ruihhlo mante tihral a ni


Central YMA hnuaia ruihhlo dotu, Central Anti Drugs Squad (CADS)-in kumin March 15 aṭanga June thla thlenga ruihhlo an mante chu nimin khan CYMA Hall kawtah tihral a ni a; chief minister Lalduhoma'n a hmanpui.

CYMA general secretary Prof. Malsawmliana tarlan danin, nimina ruihhlo tihralte chu heroin (no. 4) hawng 861 leh Tictac bûr 1,498, methamphetamine kg. 10, damdawi chi hrang hrang mûm 25,383, ganja kg. 56, codein ûm 2,805 leh zu tam tham tak a ni a; a vaiin cheng nuai 429.27 hûa chhût a ni.

Ruihhlo tihralnaah hian tuia chiah zawpa tihchhiat theihte chu CYMA Hall kawtah Chief Minister-in tuiah a chiah ral a; khawpui chhunga tihral remchang lo leh him lote chu hmun dangah CADS member-te'n an tiral thung.

Kumin March 15 aṭangin June thla thlengin CADS-in ruihhlo kaihhnawihah mi 809 an man a, chung zinga mi 37 chu home/centre-ah an dah a, Excise & Narcotics hnenah mi 48 leh Police-ah mi an hlan a; mi 440 chu councelling pek an ni.

Ruihhlo tihral hmain inkhawm buatsaih a ni a, CYMA president Lalhmachhuana'n a kaihruai. CM Lalduhoma chuan, khawtlang nun siamṭhatna turah YMA chu Mizo hnam innghahna a nih thu sawiin, "YMA kan nei hi kan vannei em em. Mamawh tam tak in nei tih kan hria a, ka theih ang angin ka lo ṭang ve ang. Ruihhlo do leh ngawlveite enkawl dam hi hna harsa tak a nih avangin Pathian ráwn chunga kal a pawimawh," a ti.

Chief Minister chuan, ruihhlo donaah chhungkua leh khawtlang tana mi hnawksakte dah khawm lailâwkna tur mamawh a nih thu sawiin, "Chung mite enkawlna tur home ṭha, skill training kan kalpui theihna a ngai a, chuta training chhuakte chu eizawnna bul ṭan thei tura ṭanpui a ṭul. Ngawlveite enkawlna hi chhâwng thum anga kan kalpui chuan mumal leh nghet zawkin kan enkawl dam theiin a rinawm," a ti a; ruihhlo ngaite dik taka enkawlna tur sorkarin a dap mek a, kohhran hrang hrang sorkarin a dawr mek thu a sawi.

CYMA President chuan, nimina ruihhlo an tihralte chu CADS-in Police leh Excise lama an hlan bâng a nih chu a sawi a, "Ṭhenkhat hi chu a neitute'n an tlanchhiatsante a ni," a ti.