Halpuah leh a khaihnawih nuaikhat man police in an man

Mizoram Police DSB-te chuan nimin December 29 khan  Chawnpui Veng leh Kanan Veng, Aizawlah halpuah leh a kaihhnawih Rs. 1,01,820 man hu an man a, mi pahnih man telin thubuai siam sak an ni.

Addl. DGP tuna DGP charge la mektu LH Shanliana chuan nimin khan thuthar thehdarhtute kawmin, Covid-19 hrileng mekah halpuah leh a kaihhnawih chi hrang hrang hi mihring tan a hlauhawm em em tih sawiin, "District tinah magistrate ten khapna thu an puan chu police-ten bawhzuiin manchhuah hna thawh mek a ni," a ti.

LH Shanliana chuan Mizoram chhunga district magistrate-ten hlim taka Krismas leh kumthar kan theih nan halpuah, halmawi leh puakthei thil reng reng, silai lem leh a mu kapchhuak thei bakah sky lantern kawl, zawrh leh hal khapna order an chhuah tih sawiin, hei hi Zoram mipuite zawm theuh turin a ngen.

Addl. DGP chuan heng puakthei thil tilui leh hal chu thubuai siam sak zel an ni dawn tih sawiin, "Dan bawhchhia mante chu R. 1000 chawitir leh kum ruk jail tantir theih an ni. Krismas vuakvetah mitinten dan an zawm a, curfew an pawisak avangin case lian tham a awm lo hi a lawmawm. Kumhlui thlahnaah pawh dan pawisa theuh turin Zoram mipui kan sawm," a ti.

Addl. DGP hi IGP pahnih Lalbiakthanga Khiangte leh Lalhuliana Fanai te, Aizawl SP C Lalruaia leh Traffic SP Rodingliana Chawngthu ten an tawiawm a ni.