Minister-in MUHCS zawmtute a tlawh; Mi 12,917 tan cheng nuai 1512.17 pe tawh

Health & Family Welfare minister Lalrinpuii chuan nimin khan Aizawla private hospital zinga Mizoram Universal Healthcare Scheme (MUHCS) zawmtute a tlawh a; kumin June 24 thlengin MUHCS hnuaiah damlo 12,917 enkawlna senso Rs 15,12,17,890 pek a nih tawh thu a sawi.

HFW Minister hian MUHCS zawmtu mimal damdawi-in pathum - Chaltlanga Nazareth Hospital, Ramhlun North-a Nazareth Hospital leh Redeem Hospital a tlawh a; Kidney 360° Superspeciality & Diagnostic Centre a tlawh bawk.

Lalrinpuii chuan, nimin thleng khan MUHCS-a inziak lut chhungkua 9,069 an awm tawh a, ABPMJAY hnuaia awm ziah luh 2,19,002, sorkar hnathawk 55,470 leh pensioner 9,310 te nen MUHCS zawmtu chhungkua 2,92,849 an awm tawh thu a sawi a, "Damlo bill kar tin pek chhuah a ni a, June 24, 2025 thleng khan mi 12,917 hnenah Rs 15,12,17,890 pek chhuah tawh a ni," a ti.

Sokarin damloin pawisa an pek ngai lo (cashless)-a MUHCS a kalpui chu mipui tana rawngbawlna a nih thu sawiin, "MUHCS hi mi zawng zawng tana duan a ni a, tihlawhtling turin sorkar hospital-te theihtawpa thuam ṭhat mek a ni. Heti chung hian sorkar hospital chauh chuan mipui min dâwl zawh loh avangin private hospital-te an pawimawh em em," a ti a; MUHCS zawm zel tura private hospital-te sáwmin, sorkar a inhawn reng thu a sawi.

Health Minister chuan, MUHCS a hlawhtlin nan thawktute'n theihtawp an chhuah tih sawiin, "An hahzia ka hriatpui a, ka chhuang tak zet. MUHCS hi a hre chiang apiangin ṭha an ti a, a ṭhatzia hi kan la hre deuh deuh dawn a ni," a ti.