Remna leh muanna chungchang zirho

Remna Ni pualin Zoram Research Foundation (ZORF), North East India Christian Council (NEICC) Peace Centre leh Aijal Club te chuan nimin Aijal Club-ah India hmarchhaka innghirnghona kara remna leh muanna chungchang zirhona, ‘Understanding Conflicts and Peace in North East India’ an buatsaih a, minister Dr Vanlalthlana'n a hmanpui.

Dr Vanlalthlana chuan, hun hrehawm tak paltlanga mipui tawrhna nasa tak karah Mizoramin remna a neih thu sawiin, "Kum heti zat state ralmuanga kan awm ta hi lawmawm tak zet. Ṭhangtharte'n inremna thuthlung, Peace Accord pawimawhna hi an zir thara an hriat chian a ṭul," a ti.

Zirhona hawnna inkhawm hi ZORF executive member Rev. Dr Lalchungnunga'n a kaihruai a; ZORF chairman Prof. Thangchungnunga leh NEICC general secretary Rev. Dr Ramengliana ten thu an sawi. Chawhnuah thupui zirho a ni.