Kawng thawmna tur lung ngaihtuahsak dawn

Public Works department minister Vanlalhlana chuan, National Highways & Infrastructure Development Corporation Limited enkawl Vairengte-Sairang inkar NH-6 kawngpui chhia siamna atana Mizoram Tipper Association (MTA), Kolasib Sub-Headquarters-in Mizoram PWD hnena lung (boulder) ngaihtuahsak tura an ngen avangin an ngaihtuahsak dawn tih a sawi.

PWD Minister hian nimin khan a pisaah NH-6 (Vairengte-Sairang) kawng siamṭhat leh enkawl chungchang NHIDCL hotute leh Kolasib MTA aiawhte a sawipui. NH-6 (Vairengte-Sairang) kawngpui chu NHIDCL hnuaia awm a nih thu leh Mizoram PWD-in hemi atan hian central aṭangin sum a hmuh theih tawh loh thu tarlan a ni.

Vanlalhlana chuan, NH-6 (Vairengte-Sairang) kawng chu kum 2020 khan Ministry of Road Transport & Highways (MoRTH)-in NHIDCL hnenah a hlan tawh thu leh, Kolasib MTA-in Mizoram PWD hnena boulder trip 50 ngaihtuahsak tura an dilna chu a ngaihtuahsak tur thu a sawi. NHIDCL-in hma an lak zui mai loh avangin Mizoram sorkarin lirthei an tlan hram hram theih nan tiin, kawng enkawlna atan kum 2024-25 khan cheng nuai 200 leh kuminah nuai 111.74 a sên tawh thu a sawi bawk.