Khàmráng-Selesih laih dan tur duh lo

Sairang, Sairang Dinthar leh Sihhmui VC leh tlawmngai pawlte chuan, Khamráng aṭanga Selesih kawngpui laihna tura ruahmanna thar chu an duh loh thu leh, kawng kalna tura ruahmanna hmasa anga laih an duh thu an tarlang.

Khaw pathuma VC leh NGO-te chuan, hmasawnna hnathawh avangin an tui tlan hnâr a chhiat nasat thu leh lui leh thingte a chereu nasat thu an tarlang a, "Kan tu leh fa, kan tuchhuan lo awm zel turte thlenga kan tawrh zel turte kan ngaihtuahin, NH-306 new alignment hi kan duh lo a, alignment hmasa/pangngaiah, chu pawh leilung, thing leh mau, luite dimdâwi taka laih ni se kan duh," an ti.

NABARD sum pûka Khamrang-Selesih kawng laihin hun rei tak chhung an tlan tawh tui hnâr a chhilh avangin tui an harsat phah tih sawiin, "Tui thianghlim lo kan ei/in a ngai a, hei vang hian mipuite hian taksa lam harsatna, zun kawng ṭha lote kan neih phah nasa niin kan hria," an ti a; rêl kawng siam avangin lui a chhiat nasat thu leh ei eizawnna hmun a chhiat nasat thu an tarlang bawk.