Sorkarin sawhthing a lei khâr a ni

Mizoram sorkarin sawhthing a lei chu nimin khan Irrigation and Water Resource department conference hall-ah chief minister Lalduhoma'n a khâr. June 27, 2025 thleng khan sorkarin sawhthing quintal 2,33,604 a lei a, support price atan sorkarin cheng vbc. 96.4 a pe tawh tih tarlan a ni.

CM Lalduhoma chuan, ZPM sorkar chu thlai thar leiah inzir chungin an kal chungin an hlawhtling thawkhat tih a sawi a, "Loneitute pawh an lawmin kan hria. Thlai pali kan han tinzâwn a, mahse, Mizo buh kan ti tel hrâm a, thlai panga kan lei ta a ni. February 20, 2025-a sawhthing lei kalpui a nih aṭangin vawiin (June 30) hi thla 4 leh ni 10-na a ni a, tunah chuan sawhthing mo thar a awm tawh si a, khâr rih mai hi ṭhain kan hria a ni," a ti.

Thlai lei nan sorkar a insenso nasat thu sawiin Lalduhoma chuan, "Cheng vbc. 100 vel kan sên ka ring. Kan theih tawka kan hralh ve bakah hian Central sorkar Market Intervention Scheme aṭangin cheng vbc. 9 vel kan hmuh ve kan beisei thung," a ti a; thlai lei chu nakkum lamah pawh kalpui zel a nih dawn thu a sawi.

Chief Minister chuan, thlai thar leiin a ken tel chu mipui moral (rilru sûkthlêk) siamṭhat a nih thu a sawi a, "A thlâwna dawn tumna a bo a, thawk rimte tan chuan bituk awm miah loa sum lak luh theihna a ni," a ti.

CM Lalduhoma chuan, thlai thar leiah thlei bik nei loin an leisak nia sawiin, "Huapzo takin kan kal. Min tihhmingchhiat tum rànin mi ṭhenkhat an che ṭhin tih kan hria a, a pawi kan ti hle," a ti a; ZPM policy chu mi tin tan a nih thu a sawi.

Adviser to CM leh Mizoram Agriculture Marketing Board co-chairman Dr KC Lalmalsawmzauva tarlan danin, June 27, 2025 thleng khan sawhthing qtl 2,33,604 an lei tawh a, lei tawh chinah support price sorkarin cheng vbc. 96.4 a pe tawh. Sawhthing hi nimin thleng khan la bûk a ni.

Mizo buh thar qtl 1,473 lei niin, sorkarin cheng nuai 44 vel a sêng a; aieng qtl 400 an lei a, hmarcha erawh leisak ngai a awm lo. Hmunphiah chu empanelled buyer-te'n qtl 10,552 leh non empanelled buyer-te'n qtl 27,277 an lei a, ZOHANCO kaltlangin qtl. 2,498 lei a ni bawk; hmunphiah lei nan sorkarin cheng vbc 2 a sêng.

CHIEF MINISTER SAWI DANGTE

■ Sawhthing leh hmunphiahah tlem khaihlak zeuh a awm tih loh chu a dang pathumah harsatna kan tâwk lo. Hmunphiaha kan buaina bul chu grade-a ṭhen tur kan ti kha a ni a, loneitute'n an harsat a, tun hnuah chuan grade ṭhen tawh loh kan ti.

■ Nakkumah pawh sawhthing market a la ṭha dawn loin kan hria a, mahse kan kal zel dawn. Rate chhiat kuma loneitute veng turin he policy hi siam a ni a, rate ṭhat kumah chuan kan inrawlh a ngai lo. Loneitute'n rilru hah miah lovin Rs 50-in an hralh thei a, kum khat leh a chanve chhunga mipui hnena pawisa thlen tam ber sorkar kan niin ka ring.

■ Environment tichhe lo zawnga loneih kan kalpui thiam deuh deuh a ngai a, permanent farming kan ngaihtuah ran a ngai.

■ Crop insurance lamah ṭan kan la mek a, a bul ṭan nan thlai thlan bikah, a chin tamna bialah kalpui kan tum. Loneitute'n man tlawm taka an thlai an insure theih nan sorkarin subsidy kan siamsak ang.