Emmy Award dawngtute lawmpui

Emmy Awards 2025 dawngtu BBC News team zinga tel Mizo journalist pahnih HC Vanlalruata leh Isaac Lalramsanga te chu nimin khan Information & Public Relations, Printing & Stationery (IPRPS) minister Dr Vanlalthlana'n a pisaah lawmpuina a hlan.

BBC News chuan documentary film an siam, 'Myanmar’s Civil War' tih hmangin 'Outstanding Continuing News Coverage - Short Form' category-ah 46th Annual News & Documentary Emmy Awards 2025 an dawng a; 'Myanmar’s Civil War' tih film-ah hian HC Vanlalruata leh Isaac Zoramsanga te telin, producer tih an ni.

IPRPS Minister chuan, khawvel huap chawimawina dawngtu zinga tel Mizo journalist-te fakawm a tih thu sawiin, "Mizoram journalism tan hmasawnna lian tak a ni," a ti a; India ram leh khawvel huap chawimawina dawng thei khawpin Mizo journalist-te'n ṭan la zel se a duh thu a sawi.

Lawmpuina inkhawmah hian IPRPS secretary Betsy Zothanpari Sailo, director C Lalnunkima leh hotu dang te, Mizoram Journalists’ Association (MJA) Gen. Hqrs hruaitute an tel a; HC Vanlalruata leh Issac Lalramsanga te pawhin thu an sawi a ni.

Minister Dr Vanlalthlana hian lawmpuina atan thuchei leh Rs 10,000 a hlan ve ve a ni.