Rêl chawlhhmunahte khawng taka ILP endik turin Home Minister ngen

Mizoram Merchant Association (MIMA) chuan Sairang thlenga rel a luh dawn avangin Bairabi leh Sairang chawlhhmun bakah, a kara rél chawhmunahte khawng taka ILP endik an duh thu leh ILP endikna changtlung tak siam an duh thu Home Minister hnenah an thlen.

MIMA hruaitute chuan nimin khan Home minister K Sapdanga a pisaah an hmu a; Sairang thlenga rêl a luh dawn avangin ILP chungchangah leh Mizo hnam himna atana hmalakna tura an duh dante an thlen a ni.

Rawtna an siamah MIMA chuan, "Rel lo luhna ṭantir Bairabi sation-a tuna ILP checkgate hi tihchangtlun a, fimkhur leh uluk taka ILP pek chhuah a, ILP nei sa thlenga uluk taka check mai bakah, computerise vek ni se," an ti.

MIMA chuan, "Bairabi leh Sairang chawlhhmun inkara station leh halt station, Sairang station thlenga chhuk leh chuang lutte uluk leh fimkhur taka ILP tih ni se," an ti a; Sairang chawlhhmun chu passenger-te an kal darh nghal mai theih lohna tura hung ni se an duh thu an thlen bawk.

Mizoram chu special area a ni tih sawiin MIMA chuan, "Rêl lo lut mai turah hian ILP felfai leh uluk leh khauh taka kalpui ngei ni se. Tun hmaa ILP kan lo kalpui dan ang mai maia ILP hi kalpui a nih chuan hnam inchîmralna kan hlat dawn lo hle kan hria," an ti a; eizawnnaah Mizote chîmral an nih loh nan ruahmanna fel tak siam turin Home Minister an ngen.

MIMA tarlan danin, Mizo ni lote'n Mizorama trade license an dil dawn chuan kum 2 chhung nung ILP neih a ngaih laiin, RTI Act hmanga an zawhna chhannaah, Vishal Mega Mart neitu Rajesh Mishra chuan February 28, 2017-a ILP (2 years validity) a dil hmain February 21, 2017-ah trade license a nei tawh.

January 31, 2025 khan Lengpui Airport-a ILP pek dan fel lo an hmuh chhuah thu tarlangin MIMA chuan, "Ranijani, Meerut, UP chuan Lengpui Airport-ah temporary ILP a dil a, ILP an pekah chuan a phone number ziah turah a blank-in pek a ni a, 'purpose of visit'-ah 'puanthân zuar' tih a ni. Puanthân hi a rawn zuar dawn em ni tih tur a ni," an ti.