Bána Kaih dilna 25 pawm thar

Mizoram State Policy Coordination Committee (MSPCC) chu nimin khan an vice chairman Dr KC Lalmalsawmzauva hoin Planning department meeting room-ah an ṭhukhawm a; Commerce & Industries department hnuaia Bána Kaih (Handholding) scheme kaltlanga loan dilna lut zinga 25 an pawm.

MSPCC-in nimina dilna 25 a pawm nen hian Bána Kaih kalpuitu department (implementing department) hrang hranga dilna pawm tawh chu 613 a ni. Dilna pawmte chu MSPCC chuan partner bank - State Bank of India, Mizoram Rural Bank leh Mizoram Cooperative Apex Bank te hnenah a thawn leh ṭhin a; partner bank-te'n dilna an dawn aṭangin loan la tur âwmte hnenah loan an pe dawn a ni.