College-a zirtirtu 'qualify' lote rawih zuina tur notification MSU-in an hâl

Sorkar enkawl college hrang hranga qualification-a tling lo part time assistant professor mi 29-te thawh hun sorkarin a pawh sei an duh lohzia lantir nan MSU Gen. Hqrs chuan nimin khan Higher & Technical Education (HTE) Directorate kawtah college zirtirtu mi 29 chhawr chhunzawmna tur notification an hâl.

MSU tarlan danin, Part time-a college assistant professor mi 29, qualification-a tling lote sorkarin a rawih mekte chu August 9, 2024 khan February 28, 2025 thleng chhawr chhunzawmna hriattirna tihchhuah a lo ni tawh a; chutah chuan, 'No more extension of engagement will be done after 28.02.2025' tih ziah tel a ni.

HTE department chuan February 21, 2025 khan college zirtirtu qualify lote hun pek belhna notification a tichhuak leh tih tarlangin MSU chuan, "Pawi kan ti hle," an ti a; notification thar tihchhuah leh chu an duh lohzia lantir nan HTE Directorate kawtah notification copy an hâl tih an tarlang.

Notification hâlnaah MSU president B Lalkhawngaihzuala chuan, zirna ṭha siam tum sorkarin zirtirtu qualify lote a ruai reng chu hriatthiam har an tih thu sawiin, "Zirtirtu qualify lote'n zirna an pek theihna tura sorkarin 'humanitarian ground' tia a chhawr hi humanitarian ground chhuanlama langsar taka dan bawhchhiatna a ni," a ti.

MSU President chuan, college zirtirtu atana tling lo chunga mi 29 chhawr reng chu ṭha an ti lo a, vawi tam tak HTE Minister hnenah an thlen tawh bakah, June 9, 2025 khan Chief Minister hnenah an thlen tawh thu leh, March 13, 2025 khan press conference an neih phah tawh thu a sawi.

MSU hian notification an hâl zawhah HTE Director hnenah college zirtirtu atana tling lote chhawr chhunzawm an duh loh thu leh bàn an duh thu ziakin an pe nawn leh a ni.

An ngen nawn lehna chu July 6, 2025 (Pathianni) ral hmaa ngaih pawimawh a nih loh chuan zirlaite'n zirna ṭha an dawn theih nan zirtirtu atana tling ngei an duhzia lantir nan Aizawlah kawngzawh huaihawt an tum thu an tarlang a, "Kawngzawhin awmzia a neih loh chuan a tàwp thlenga hma la zel turin ruahmana siam a ni," an ti.