KHAWTHLIR

Ambulance hlân

Minister of state B Lalchhanzova chuan June 30, Thawhṭanni khan a bial Aizawl East II-a Tuithiang Branch YMA hnenah MLA fund aṭanga a lei ambulance a pe. Ambulance hlanna inkhawm hi Tuithiang Middle School hall-ah neih a ni a, Minister hian Tuithiang YMA president SH Lalropuia hnenah lirthei lehkha pawimawhte a hlan a ni. Ambulance hi Eeco van a ni a, Rs 7,00,000 vel senga lei a ni.

Governor ṭanpuina

Governor’s Discretionary Grant kaltlangin nimin khan Champhia district bawrhsap Mohammed Aaquib chuan Champhai district-a home panga hnenah ṭanpuina sum a hlan. Ṭanpuina hlante chu - Mazuia Memorial Home TNT, Genesareth Gospel Home, Rose Children Home, Metakhen Zote leh Gosen Home Zote te a ni a, Rs 25,250 ṭheuh hlan a ni.

Kuhva phurh khap

Aizawl district magistrate Lalhriatpuia chuan thupek chhuahin, Aizawl district-ah danin a phal bak chin kuhva leh bungrua lak luh leh phurh khap a nih thu a tarlang. Thupêk bawhchhia chu BNS 2023 Section 223 hmangin hrem theih a ni.

Raltlan biometric enrolment sawiho

Champhai bawrhsap Mohammed Aaquib hoin nimin khan DC conference hall-ah ráltlân chhinchhiahna (biometric enrolment) kalpui dan tur sawiho a ni a; biometric enrolment kalpui tur chu DC Office leh SP Office kutah an dah. Champhaia veng tinah VC, YMA, MHIP leh MUP aiawh pakhat ṭheuh telna biometric team an din a, team-te tan July 15-20, 2025 chhungin training buatsaih an rêl.

Kawng khâr dawn

Dinthar Bazar - Dawrpui Vengthar inkara KM Higher Secondary School panna kawngah tuichhe paihna pipe phûm hna thawh mek a ni a, hna thawh zawh hma zawng ni tin chawhma dar 10 aṭanga tlai dar 4 thleng kawng khâr a ni dawn tih Traffic SP chuan a tarlang.