Minister-in sorkar laipui hotute a kâwm; Aizawlah Narcotics Control Bureau pisa dah tum

Minister of state Lalnghinglova Hmar chuan nimin khan New Delhi-ah a department enkawl kaihhnawih sorkar laipui hotute a dâwr a; ruihhlo donaah chak zawka hmalak a nih theih nan Aizawlah Narcotics Control Bureau (NCB) Zonal Office din a ni dawn tih tarlan a ni.

Excise & Narcotics minister Lalnghinglova Hmar hian Narcotics Control Bureau director general Anurag Garg a kâwm a; Mizorama ruihhlo do turin sorkar laipui nen thawhhona ṭha neih a ṭul thu sawiin, "Myanmar ramri kaltlangin ruihhlo a rawn lut nasa a, intelligence-sharing leh thawktute training pek kawngah Mizoram Excise & Narcotics department thuam chak a ngai," a ti.

Anurag Garg chuan, END Minister ngen­na angin Mizo­ram leh hmar­chhak state danga narcotics kaihhnawiha thawk­tute tan training an buat­saih dawn thu a lo hrilh a; Aizawlah NCB Zonal Office hawng tura ruahman mek a nih thu leh, Myanmar aṭanga ruihhlo lut do kawngah tun aia inhnaih leh inpawh zawka thawhho a ṭul thu a sawi.

Sports & Youth Services minister Lalnghinglova hian Ministry of Youth Affairs and Sports secretary (Youth Affairs) Dr Pallavi Jain Govil a kâwm a; Department of Youth Affairs hnuaia ṭhalai hmasawnna kaihhnawih activity hrang hrangte chu Mizoramah nghah ve ṭhin ni se a duh thu leh, Mizoram pawn aṭanga ṭhalai tam zawk hîp thei turin Aizawlah youth hostel sak a ngaih thu a thlen. Youth Affairs Secretary chuan, a theih anga hma an lak tur thu a lo hrilh.

Lalnghinglova Hmar hian Ministry of Finance hnuaia Department of Public Enterprises secretary Moses Chalai pawh a kâwm a; hmasawnna hna thawhnaah sorkar laipuia public sector enterprise-te kaltlanga puihna awm theite a sawipui. Ministry of Home Affairs hnuaia Border Management secretary Dr Rajendra Kumar chu ramria ruihhlo tawlh chungchanga thawhho theihnate a sawipui bawk.