Mamita dialysis khawl sawn chhan NHM Mission Director-in a sawifiah

National Health Mission (NHM), Mizoram Mission Director chuan, Mamit District Hospital-a hman tura dialysis khawl pek tawh, district danga dah sawn leh chhan chu, July 5, 2025 ral hma ngeia khawl bun a ngai a, Mamit District Hospital-ah bun theih a nih rih si loh vang a nih thu a tarlang.

NHM Mission Director chuan thuchhuah siamin, Pradhan Mantri National Dialysis Program (PMNDP) hnuaiah district tinah dialysis centre din tum a nih thu a tarlang a, "Mizoram pawhin hemi bawhzui hian district tin (district thar pathum tel rih loin)-ah dialysis centre din tumin hma a la mek," a ti.

Mission Director tarlan danin, Aizawl leh Lunglei chauha dialysis centre awm ṭhin chu PMNDP hmalakna avangin Champhai leh Kolasib-ah din a ni tawh a; Mamit, Siaha leh Lawngtlaiah din leh tura hmalak mek a ni.

​Mamit, Siaha leh Lawngtlai tan CSR aṭangin Mizoramin dialysis khawl dawn a ni a, April 2025 khan a awmna turah dah a ni. Mamit tana dialysis khawl pali dawnte chu building hluiah hmun a awm loh vangin building thar luah huna bun tura ruahman a ni a; damdawi-in building thar luah a la nih loh avangin June 15, 2025 thleng nghah an phalsak a ni.

Khawl petute'n installation report leh utilisation certificate an thehluh a ngaih tawh avangin July 5, 2025 ral hma ngeia bun tur leh, bun theih loh chhanah chhuanlam neih a rem tawh loh thu NHM an rawn hriattir a; Mamitah khawl bun theih a la nih loh chuan district dang, khawl bun nghal theihnaah dah (relocate) mai turin an hriattir bawk.

Khawl petute thurâwn angin hmunhma nei sa Champhai leh Serchhip district hospital-ahte khawl pahnih ve ve sawn tura tih a nih thu tarlangin Mission Director chuan, "July 5, 2025 hmain Mamit District Hospital-ah dialysis khawl bun hman ngaihna a awm tawh loh avangin, district dang, khawl bun nghal theihna hmunah khawlte hi sawna install mai a ngai ta a ni," a ti.

NHM Mission Director chuan, Mamit District Hospital-ah dialysis centre din ngei tura hmalak zel a nih thu sawiin, "RO plant pawh Health department-in Mamitah dah tawhin, reprocessor machine pawh lei mek a ni a, dialysis khawl pawh hi CSR aṭangin dil leh nghal a ni," tiin a tarlang.

Mamit District Hospital tana dialysis khawl pali pek chu bun theih a nih rih loh avangin pahnih chu Serchhip District Hospital-a dah turin June 26, 2025 khan phurh chhuah a ni a, pahnih dang pawh Champhai District Hospital-a dah tura tih niin, phurh chhuah a la ni lo.

La phurh chhuah loh khawl pahnih chu Mamit NGO Coordination Committee, All Party, Joint VC leh MJA ten phurh chhuah an phal lo a, phurh chhuah a nih loh nan an veng zui. Khawl phur chhuak lo a, Mamit District Hospital-ah ngei bun turin Health Minister an phût a ni.