COVID-19: Mizoram dinhmun Hripui vei mi 6 hmuh belh a ni
December 28, Thawhṭanni khan Mizoramah Covid-19 vei mi paruk hmuh chhuah belh a ni a, Mizoram chhunga kái vek niin, an zingah natna (Covid-19 symptom) lang chhuak mi pakhat a awm. Nimin khan hripui laka fihlim tawh mi 20 chhuahtir an ni thung.
Covid-19 vei Thawhṭannia hmuh chhuah tharte chu mipa pakhat leh hmeichhia panga an ni a; ZMC laboratory-a hmuh mi pahnih leh Rapid Antigen Test (RAT) hmanga hmuh mi pali an ni. TrueNAT-PCR hmanga endik zingah hripui vei an awm lo.
December 28 khan ZMC-ah sample 493, TrueNAT-PCR hmangin district pariatah sample 224 leh RAT hmangin district 10-ah sample 436 endik a ni a, a vaiin sample 1,153 a ni. Covid-19 positive hmuh chhuah mi parukte chu sample endik zat aṭangin 0.52% a ni.
Sorkar thuchhuah tarlan danin, ZMC-a hmuh chhuahte chu Hunthar Venga mi pahnih, mipa kum 11 leh hmeichhia kum 18 an ni a; tualchhunga kái, kaina hriat, symptom nei lo ve ve an ni.
RAT hmanga hmuh chhuah mi palite chu hmeichhia vek an ni a, tualchhunga kai vek an nih bakah, symptom nei pakhat a awm. An zinga pakhat chu a kài ṭanna hriat a ni lo.
Nimin khan Covid-19 laka fihlîm tawh mi 20 chu enkawlna hmun aṭangin chhuahtir an ni a; Durtlang BSUP CCC leh Serchhip CCC aṭangin mi pahnih ve ve, Zobawk CCC aṭangin mi pasarih leh Pukpui CCC aṭangin mi paruk, Kolasib CCC aṭangin mi pathum an chhuak a ni.
Mizorama Covid-19 vei mi 4,190 hmuh chhuah tawhte chu mipa 3,076 leh hmeichhia 1,114 an ni a; nizan dar 8 thleng khan damin mi 4,088 (97.57%) chhuahtir an ni tawh a, mi pariat (0.19%) thi tawhin, enkawl mek mi 94 (2.24%) an awm.
December 28 thleng khan Mizoramah swab sample 1,77,387 endik tawh niin, chu'ng aṭanga Covid-19 positive hmuh chhuah tawh 4,190 chu 2.36% a ni.
Mizorama Covid-19 positive hmuh chhuah tawh mi 4,190 zinga mi 1,990 chu Mizoram chhunga kái an ni a, mi 2,200 chu state páwn aṭanga rawn lût an ni.
RAT hmanga hmuhte:
Hunthar Veng : 1 - Hmeichhia kum 41, Civil Hospital, Aizawl OPD-a inentir tura kal, screening point-a endik, symptom nei, hri kàina hriat chian loh.
Durtlang - 1: Hmeichhia kum 30, Aizawla damdawi-in pakhata inentir tura kal, screening point-ahmuh chhuah, hri kaina hriat loh, symptom nei lo.
Mámpui - 2: Hmeichhe kum 5 leh 7; tualchhunga kai, symptom nei lo ve ve.