Minister hoin thing phun beihpui thlak

Cooperative Societies Registrar pisa chuan nimin khan UN kumpuan - International Year of Cooperatives 2025 hnuaia an hmalakna pakhat, Ek Ped Maa Ke Naam (nu hminga thing phunna) hun MULCO Complex, Ṭhuampuiah an hmang a, Cooperation minister PC Vanlalruata'n a hmanpui.

Cooperation Minister chuan, thing phun a pawimawh thu sawiin, "Cooperation department, cooperative society leh federation-te hmalakna a fakawm. Khawvel nuam zawk leh boruak ṭha zawk siam hi cooperative thil tum pawimawh a ni a, UNO pawhin a ngai pawimawh a, kum 2025 pawh International Year of Cooperatives tiin a puang a ni," a ti.

Mizoramah cooperative movement tihhmasawn nan ṭan lak tlan a ṭul thu sawiin PC Vanlalruata chuan, International Year of Cooperatives pualin thing phun mai ni lo, thisen pek rûnpui emaw, mite'n eizawnna an neih theihna tur thil emaw, ṭhalai tam zawkte cho chhuak tur thil ṭha dang emaw tichhuak tura ngaihtuahna seng turin cooperative hruaitute a chah.

Cooperative Societies registrar John LT Sanga chuan International Year of Cooperatives 2025 puala Mizorama hmalakna hrang hrangte a tarlang a ni.